काठमाडौं | लामो समयदेखि गैरहाजिर रहेका २२ जना प्रहरी कर्मचारीलाई एक साताभित्र सम्पर्कमा आउन प्रहरी प्रधान कार्यालयले आग्रह गरेको छ ।
प्रहरी प्रधान कार्यालयको कानुन शाखाले आज सूचना प्रकाशित गर्दै ती प्रहरी कर्मचारीहरूलाई सात दिनभित्र सम्पर्कमा नआए सेवाबाट हटाइने चेतावनी दिएको हो ।
गैरहाजिर हुनेहरूमा प्राविधिकतर्फका एक जना प्रहरी सहायक निरीक्षक (असई) सहित चार जना असई, दुई जना कार्यालय सहयोगी र बाँकी सबै प्रहरी जवान छन् ।
उनीहरू लामो समयदेखि कुनै जानकारीबिना गैरहाजिर रहँदै सम्पर्कविहीन भएकाले प्रहरी नियमावली अनुसार प्रक्रिया अघि बढाइएको सूचनामा उल्लेख गरिएको छ ।
प्रहरी प्रधान कार्यालयले सूचना प्रकाशित गरी उनीहरूलाई सात दिनको अन्तिम अवसर दिएको जनाइएको छ ।
