रुसको कामचाट्का प्रायद्वीपमा बुधबार ८.८ म्याग्निच्युडको शक्तिशाली भूकम्प आएपछि प्रशान्त महासागर क्षेत्रभरि सुनामीको खतरा उत्पन्न भएको छ ।
अमेरिकी राष्ट्रपति डोनाल्ड ट्रम्पले अलास्का र अमेरिकाको प्रशान्त तटमा सुनामी निगरानी जारी रहेको जानकारी दिएका छन् । भूकम्पको प्रभावले हवाई, जापान, रूस र प्रशान्त टापुहरूमा सुनामी चेतावनी जारी गरिएको छ। ट्रम्पले tsunami.gov मा जान सबैलाई सल्लाह दिँदै भनेका छन्, “बलियो रहनुहोस्, सुरक्षित रहनुहोस् ।”
जापानले पनि सुनामीको निगरानी गरिरहेको जनाइएको छ। अमेरिकी भूगर्भ विभागका अनुसार यो भूकम्प दशकौंदेखिकै सबैभन्दा शक्तिशाली मानिएको छ । भूकम्पपछि प्रशान्त महासागरको विभिन्न भागमा ४ मिटर (१३ फिट) सम्म अग्लो छाल उत्पन्न भएको बताइएको छ । विशेषगरी कुरिल टापु क्षेत्रमा सुनामीले ठूलो प्रभाव पारेको प्रारम्भिक रिपोर्ट आएको छ । अमेरिकामा सुनामीको खतरा बढेपछि मोबाइल फोनमा आपतकालीन चेतावनी पठाइएको छ ।
लस एन्जलस लगायतका शहरका बासिन्दालाई सार्वजनिक सुरक्षा चेतावनी दिइएको छ । स्थानीय प्रशासनले समुद्र तट, बन्दरगाह, र तटीय तल्लो क्षेत्रहरूमा खतरनाक छाल आउन सक्ने भन्दै त्यहाँबाट टाढा रहन निर्देशन दिएको छ । साथै, केही क्षेत्रमा मानिसहरूलाई सुरक्षित स्थानमा सार्ने कार्य सुरु गरिएको छ ।
विशेषज्ञहरूका अनुसार केही घण्टा भित्र सुनामीको प्रभाव देखिन सक्ने भएकाले सबैलाई उच्च सतर्कता अपनाउन आग्रह गरिएको छ ।
भिडियाे सामाग्री
