रक्सौल । भारतको बिहार राज्यस्थित सीमावर्ती सहर रक्सौलमा सशस्त्र सीमा बल (एसएसबी) ले समाजलाई लागुऔषधमुक्त बनाउने उद्देश्यले ‘नशामुक्त भारत अभियान’ सञ्चालन गरेको छ ।
सीमाको सुरक्षासँगै युवालाई लागुऔषधको दुर्व्यसनबाट जोगाउने र समाजमा जनचेतना फैलाउने उद्देश्यले सीमावर्ती पन्टोका क्याम्पमा कार्यक्रम आयोजना गरिएको हो ।
कार्यक्रमको उद्घाटन पश्चिम चम्पारणका सांसद तथा भारतीय जनता पार्टी (भाजपा) का पूर्व प्रदेश अध्यक्ष डा. सञ्जय जयसवाल, एसआरपी अस्पतालका निर्देशक डा. सुजीत कुमार र एसएसबीको ४७औँ बटालियनका कमान्डेन्ट सञ्जय पाण्डेयले संयुक्त रूपमा गर्नुभएको थियो ।
कार्यक्रममा विद्यालयका विद्यार्थीहरूले सडक नाटक प्रस्तुत गर्दै लागुऔषध सेवनबाट हुने स्वास्थ्य समस्या, आर्थिक क्षति र पारिवारिक विखण्डनबारे जनचेतना फैलाएका थिए। उनीहरूले लागुऔषधको दुर्व्यसनले व्यक्ति मात्र नभई परिवार र समाजलाई समेत असर गर्ने सन्देश दिएका थिए ।
एसआरपी अस्पतालका निर्देशक डा. सुजीत कुमारले नशामुक्ति अभियानका तीन प्रमुख उद्देश्य रहेको बताउनुभयो । उहाँका अनुसार युवालाई लागुऔषधको दुर्व्यसनबाट जोगाउने, दुर्व्यसनमा फसेकाहरूको उपचार गर्ने र लागुऔषधविरुद्ध समाजमा जनचेतना फैलाउने अभियानका मुख्य लक्ष्य हुन् ।
कार्यक्रमलाई सम्बोधन गर्दै सांसद डा. सञ्जय जयसवालले मदिरा, गाँजा, चरेस तथा अन्य लागुऔषधसँगै मोबाइलको अत्यधिक प्रयोग पनि आजको समाजका लागि चुनौती बन्दै गएको बताउनुभयो। उहाँले युवालाई पुस्तक पढ्ने बानी विकास गर्न र मोबाइलको सदुपयोग गर्न आग्रह गर्दै लागुऔषधबाट टाढा रहन सुझाव दिनुभयो ।
कार्यक्रमका क्रममा सांसद जयसवालले हालै सम्पन्न विधान परिषद् निर्वाचनबारे पनि प्रतिक्रिया दिनुभएको थियो । उहाँले विरोधका बाबजुद भाजपाले राम्रो प्रदर्शन गरेको दाबी गर्दै पटना निर्वाचनलाई प्रतिष्ठाको विषयका रूपमा लिइएको बताउनुभयो। उहाँले नीरजको जितबारे पनि उल्लेख गर्नुभएको थियो ।
एसएसबीको ४७औँ बटालियनका कमान्डेन्ट सञ्जय पाण्डेयले नशामुक्त भारत अभियानमार्फत युवालाई दुर्व्यसनबाट जोगाउँदै स्वस्थ, सशक्त र जिम्मेवार राष्ट्र निर्माणमा योगदान पुर्याउने उद्देश्य रहेको बताउनुभयो ।
कार्यक्रममा कम्प्युटर तालिम प्राप्त युवालाई प्रमाणपत्र वितरण गरिएको थियो। सडक नाटक प्रस्तुत गर्ने विद्यार्थी तथा स्वास्थ्य परीक्षणमा सहभागी स्वास्थ्यकर्मीलाई प्रशंसापत्र प्रदान गरिएको थियो ।
यसैगरी, कार्यक्रममा मानव तथा पशु स्वास्थ्य उपचारको व्यवस्था गरिएको थियो। ग्रामीण क्षेत्रका बासिन्दाले निःशुल्क स्वास्थ्य परीक्षण तथा उपचार सेवा प्राप्त गरेका थिए। एसएसबीको मेडिकल टोली र निजी अस्पतालका स्वास्थ्यकर्मीले निःशुल्क उपचार गर्नुका साथै औषधिसमेत वितरण गरेका थिए ।
सीमा सुरक्षासँगै सामाजिक उत्तरदायित्वअन्तर्गत सञ्चालन गरिएको यस अभियानले सीमावर्ती क्षेत्रका बासिन्दा तथा युवामा लागुऔषधविरुद्ध सचेतना अभिवृद्धि गर्ने अपेक्षा गरिएको छ ।
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
