जनकपुरधाम | प्रदेशको राजधानी जनकपुरधाम उपमहानगरपालिकामा फोहोर व्यवस्थापन दिन प्रतिदिन चुनौतीपूर्ण बन्दै गएको छ । नगर क्षेत्रका विभिन्न सडक किनारमा थुप्रिएका फोहोरले पैदलयात्रीलाई नाक छोपेर हिँड्नुपर्ने बाध्यता छ भने स्थानीयवासी वातावरण प्रदूषणको मारमा परेका छन् ।
उपमहानगरपालिकाका उपप्रमुख किशोरी साहका अनुसार जनकपुरधामको मुख्य समस्या फोहोर व्यवस्थापनस्थल (डम्पिङ साइट) को अभाव हो । फोहोर व्यवस्थापनका लागि उपमहानगरले प्रत्येक वडामा कम्तीमा एउटा ट्र्याक्टर र सरसफाइ कर्मचारी परिचालन गरेको र दैनिक दुई पटक सरसफाइ भइरहेको दाबी गरे पनि डम्पिङ साइट नहुँदा समस्या आएको उनको भनाइ छ ।
यसै विषयमा उपमहानगरपालिकाका सरसफाइ प्रमुख श्याम ठाकुरले सरसफाइ व्यवस्थापनमा उपमहानगर पूर्ण रूपमा संवेदनशील रहेको दाबी गरे । उनका अनुसार सरसफाइका लागि प्रत्येक वडामा बिहान र बेलुकी दुईपटक जनचेतनामूलक अडियोसहित ट्र्याक्टर पठाएर फोहोर सङ्कलन गरिँदै आएको छ। तर, उपमहानगरले १४० स्वीपर दैनिक दुई पटक परिचालन गर्दा पनि सहर सफा हुन सकेको छैन ।
यता, स्थानीयवासी र जनप्रतिनिधिबीच एक-अर्कालाई दोषारोपण गर्ने क्रम पनि जारी छ । शहरमा जताततै फोहोर देखिनुमा जनप्रतिनिधिले स्थानीयवासीलाई दोष दिइरहेका छन् भने स्थानीयवासीले जनप्रतिनिधि नै गम्भीर नहुँदा सरसफाइको अवस्था दयनीय बनेको बताउँछन् ।
उपमहानगर-४, मुरली चोकका स्थानीय सुदीप पाठकका अनुसार डस्टबिन नहुँदा मानिसले जथाभावी फोहोर फाल्ने गरेका छन् । पसलेहरूले आफ्नो पसलभित्रको फोहोर निकालेर बिहानै आउने कुरा पनि भने। पाठकले भने, 'पसल बन्द गर्ने बेलासम्म फोहोर सडक किनारमा फालेर हिँड्नुपर्ने अवस्था छ । समयमै नगरपालिकाका कर्मचारी आएर त्यो फोहोर उठाएनन् भने भोलिपल्ट सडक किनारमा जताततै फोहोर देखिनु स्वाभाविक हो।' उनले डम्पिङ साइटको अभावका कारण फोहोरको समस्या झन् बढेको बताए ।
उपमहानगरपालिकाका प्रमुख मनोज कुमार साहले आफ्नो घोषणापत्रमा डम्पिङ साइट निर्माण गर्ने वाचा गरे पनि त्यो कहिल्यै पूरा नभएको स्थानीयको गुनासो छ । उनी भने आफ्नो घोषणापत्रमा गरेका वाचा पूरा गर्न प्रतिबद्ध रहेको बताउँछन्। डम्पिङ साइटका लागि जग्गा उपलब्ध नहुँदा काम अघि बढ्न नसकेको र यसका लागि पटक-पटक जिल्लादेखि केन्द्रीय तहसम्म धाइरहेको उनको भनाइ छ ।
डम्पिङ साइटका लागि स्थानीयवासीले पनि सहयोग नगरेको गुनासो उनले गरे । 'जहाँ डम्पिङ साइट रोजिन्छ, त्यहाँका स्थानीयले दुर्गन्ध आउँछ भन्दै विरोध गर्छन्,' उनले भने ।
युवा अभियन्ता सरोज मिश्रले सरसफाइमा वडाध्यक्षहरू गैरजिम्मेवार हुँदा समस्या थपिएको बताए । 'समस्या नगरपालिकामा छ वा वडामा छ, यो उनीहरूले नै थाहा पाऊन्, तर सरसफाइ समस्या झन् झन् बढिरहेको छ,' मिश्रले भने, 'स्थानीयमा पनि चेतनाको कमी छ । सबै काम नगरपालिकाले मात्र गर्छ भन्ने सोचका कारण समस्या बढेको हो।' उनले मुख्य चोक र बजारमा डस्टबिन राख्न आवश्यक रहेको औंल्याए ।
वडा नं. ८ का अध्यक्ष दिनेश कुमार सिंहले आफ्नो वडाका विभिन्न ठाउँमा डस्टबिनको व्यवस्था गरिएको जानकारी दिए। तर, एउटा ट्र्याक्टर र दुईजना सरसफाइ कर्मचारीले मात्र सम्पूर्ण काम धान्न नसक्ने उनको भनाइ छ। यस्तै, वडा नं. ७ का वडाध्यक्ष झले सरसफाइका लागि थप जनशक्ति आवश्यक रहेको र उपमहानगरले इमानदारीपूर्वक सहयोग गर्नुपर्ने बताए ।
फोहोर व्यवस्थापनका लागि उपमहानगरले हालै १४२ बिघा जग्गा भाडामा लिन सूचना सार्वजनिक गरे पनि सम्पर्कका लागि कोही पनि नआएको स्रोतले जनाएको छ ।
भिडियाे सामाग्री
