सोमबार दिउँसो वीरगंज-१६ रजत जयन्ती चोकस्थित एक होटलमा गोली चलेको छ ।
भारतको झारखण्ड निवासी अन्दाजी ३० वर्षीय प्रदीप शर्माले बिहारकी २८ वर्षीया निशाकुमारी सहनीलाई गोली हानेका हुन् । बायाँ गालामा गोली लागेर घाइते निशालाई नारायणी अस्पतालमा उपचार भइरहेको पर्साका प्रहरी नायब उपरीक्षक (डीएसपी) किशोर लम्सालले जानकारी दिएका छन् ।
घटना पछि भागेका शर्मालाई वीरगंजको भन्सार क्षेत्रबाट सशस्त्र प्रहरीले नियन्त्रणमा लिएर नेपाल प्रहरीको जिम्मा लगाएको सशस्त्र प्रहरी उपरीक्षक पुरनचन्द्र भट्टले बताए । उनी कटुवा पेस्तलसहित पक्राउ परेका छन् ।
शर्माले निशालाई किन र के कारणले गोली हानेको हो भन्ने विषयमा अनुसन्धान भइरहेकाे प्रहरीले जनाएकाे छ ।
