महोत्तरी । सडक मानव, असहाय बालबालिका, परित्यक्त वृद्धवृद्धा र मानसिक स्वास्थ्य समस्याबाट पीडित व्यक्तिहरूलाई आश्रय दिने उद्देश्यले बर्दिबासमा निर्माण भइरहेको ‘हाम्रो मायाको घर’ अन्तिम चरणमा पुगेको छ । निर्माण समिति अध्यक्ष शम्भु भट्टराईका अनुसार भवन निर्माण कार्य करिब ९० प्रतिशत पूरा भइसकेको छ ।
बर्दिबास–२ हङ्कङडाँडा नजिक निर्माणाधीन भवन र क्यान्टिन गरी दुईवटा संरचनाको निर्माण अन्तिम चरणमा पुगेको भट्टराईले जानकारी दिनुभयो । उहाँका अनुसार भवन निर्माण सम्पन्न गर्न अझ करिब एक करोड रुपैयाँ आवश्यक रहेको छ । ‘केही मौज्दात रकम पनि छ, बाँकी बक्यौता उठेपछि खर्चको अभाव हुनेछैन,’ उहाँले बताउनुभयो ।
‘हाम्रो मायाको घर’का लागि स्थानीय १५ जना दाताले करिब डेढ करोड रुपैयाँ बराबरको साढे पाँच कठ्ठा जग्गा दान गरेका थिए । भागवत मञ्जरी राधिका दासीको प्रेरणामा बर्दिबासमा आयोजित महायज्ञमार्फत करिब १ करोड ८२ लाख ४२ हजार रुपैयाँ सङ्कलन गरिएको थियो । त्यसपछि विभिन्न सङ्घसंस्था र निकायले थप सहयोग गरेपछि भवन निर्माण सुरु गरिएको हो ।
अध्यक्ष भट्टराईका अनुसार हालसम्म भवन निर्माण र थप जग्गा खरिदमा १ करोड १८ लाख ९ हजार रुपैयाँ खर्च भइसकेको छ । करिब १० लाख मौज्दात रकम छ भने ८० लाख रुपैयाँ जति बक्यौता उठ्न बाँकी रहेको जानकारी दिनुभयो ।
०८१ साल साउनमा तत्कालीन मुख्यमन्त्री सतिसकुमार सिंहले शिलान्यास गरेपछि भवन निर्माण कार्य थालिएको हो । वर्ष दिनको छोटो अवधिमा कम लागतमा भएको निर्माण प्रगति आफैंमा उदाहरणीय भएको समितिले जनाएको छ ।
प्रदेश सांसद शारदादेवी थापाले ‘मायाको घर’लाई दान, धर्म, दया र स्नेहको प्रतीक बताउँदै यसलाई श्रम, सहयोग, इमान र मितव्ययिताको उदाहरणीय नमुना भएको उल्लेख गर्नुभयो ।
होटल तथा पर्यटन महासङ्घ मधेश प्रदेशका अध्यक्ष हीरा गौतमका अनुसार यो भवन असहाय सडक बालबालिका, वृद्धवृद्धा, मानसिक रोगी तथा परिचय गुमाएका व्यक्तिहरूलाई नयाँ जीवन र माया दिने उद्देश्यले निर्माण भइरहेको हो ।
यसअघि रोटरी क्लब अफ बर्दिबासका अध्यक्ष सीताराम ढुंगेलको सहकार्यमा भवन परिसरमा विभिन्न प्रजातिका ३० वटा बिरुवा रोपण गरिएको थियो । ‘हाम्रो मायाको घर’ अब छिट्टै बर्दिबासका सडक मानवका लागि आश्रयस्थल बन्ने तयारीमा रहेको बताइएको छ ।
