मधेस प्रदेशमा स्वास्थ्य कार्यालय पर्सा लगातार चार वर्षदेखि कार्यसम्पादनमा प्रथम हुँदै आएको छ ।
स्वास्थ्य तथा जनसंख्या मन्त्रालयले प्रत्येक वर्ष गर्ने प्रदेशव्यापी कार्यसम्पादन मूल्यांकनमा पर्साले आर्थिक वर्ष २०७८/७९ देखि निरन्तर उत्कृष्टता कायम राख्दै आएको हो । गत आर्थिक वर्ष २०८१/८२ को मूल्यांकनमा पनि स्वास्थ्य कार्यालय पर्सा ८७ अंकसहित पहिलो स्थानमा रह्यो ।
यस्तै, स्वास्थ्य कार्यालय सर्लाही दोस्रो र महोत्तरी तेस्रो भएको स्वास्थ्य मन्त्रालयले जनाएको छ ।
८ जिल्लामध्ये पर्सा पुनः उत्कृष्ट
मधेस प्रदेशको स्वास्थ्य मन्त्रालयले ८ वटा स्वास्थ्य कार्यालय, ११ वटा प्रदेशस्तरीय अस्पताल र एक स्वास्थ्य विज्ञान प्रतिष्ठानको कार्यसम्पादन मूल्यांकन गर्दै आएको छ । यस वर्षको मूल्यांकन मन्त्रालयस्तरीय समिति गठन गरेर सम्पन्न गरिएको थियो ।
मन्त्रालयका अनुसार सेवा प्रवाह, सेवाग्राहीको सन्तुष्टि, योजनाको कार्यान्वयन, स्वास्थ्य सूचकको सुधारजस्ता मापदण्डका आधारमा गरिएको मूल्यांकनमा पर्साले पुनः उत्कृष्ट अंक प्राप्त गरेको हो । आइतबार जनकपुरमा आयोजित प्रदेशस्तरीय वार्षिक समीक्षा गोष्ठीमा मधेस प्रदेशका मुख्यमन्त्री सरोजकुमार यादवले प्रथम भएको स्वास्थ्य कार्यालय पर्साका निमित्त प्रमुख विनोद झालाई प्रमाणपत्रसहित सम्मान गरे ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार सेवा–प्रवाहमा निरन्तर सुधार, स्वास्थ्यकर्मीको सक्रियता र जनताप्रति उत्तरदायित्वपूर्ण व्यवहारका कारण पर्सा चार वर्षदेखि उत्कृष्ट बन्दै आएको हो । उनले भने, “लगातार चार वर्षसम्म प्रथम बन्नु सहज कुरा होइन ।
स्वास्थ्य कार्यालय पर्साको टीमवर्क, सेवा गुणस्तर र जनतासँगको भरोसाको कारण हामीले यो सफलताको निरन्तरता कायम राख्न सकेका छौँ ।” स्वास्थ्य मन्त्रालयका अनुसार निरन्तर उत्कृष्टतासँगै पर्सा प्रदेशस्तरको स्वास्थ्य सेवा सुधारमा ‘मोडेल कार्यालय’ का रुपमा स्थापित हुँदै गएको छ ।
कार्यसम्पादनको दर बढिरहेको, सेवाग्राही सन्तुष्टि उच्च रहेको तथा विभिन्न स्वास्थ्य कार्यक्रमको प्रभावकारी कार्यान्वयन पर्सालाई लगातार शीर्षमा पुर्याउने आधार बनेको मन्त्रालयको अभिमत छ ।
