सिंहदरबार भित्र र बाहिर लगातार उत्पात, होहल्ला र हुलदंगा मच्चाइरहेका समूहको नेतृत्व पूर्वमन्त्री तथा आम जनता पार्टीका अध्यक्ष प्रभु शाहका छोरा विकेश साहले गरिरहेको प्रहरी अनुसन्धानले पुष्टि गरेको छ ।
सिंहदरबार सुरक्षार्थ खटिएको प्रहरी गणले विकेशसहित मिराज ढुंगाना, सुप्रिया शाहीलगायत व्यक्तिहरूले विभिन्न समूह बनाएर दिनहुँजसो सरकारी क्षेत्रलाई अस्थिर तुल्याइरहेको विस्तृत रिपोर्ट माथिल्लो निकायमा पठाएको छ ।
सिंहदरबार परिसरमा दुई दिनमै दोहोरो हुलदंगा
सोमबार र मंगलबार विकेश नेतृत्वको समूहले सिंहदरबार परिसरमै हुलहुज्जत, नाराबाजी र सुरक्षाकर्मीमाथि दुर्व्यवहार गरेको प्रहरीले जनाएको छ । उनीहरू जेन–जी आन्दोलनको नाममा जबरजस्ती गर्ने, ढुंगा प्रहारदेखि अवरोध सिर्जना गर्ने जस्ता गतिविधिमा सक्रिय रहेको पाइएको हो ।
अपराध महाशाखाका अनुसार विकेश जेन–जी आन्दोलनकै क्रममा संसद भवन, नेकपा (एमाले) केन्द्रीय कार्यालय र अन्य स्थानमा गरिएका आगजनी घटनामा समेत प्रत्यक्ष संलग्न रहेको देखिने भिडियो प्रहरीसँग सुरक्षित रहेकाे जनाएकाे छ । ‘‘विकेश साहका गतिविधिहरू योजनाबद्ध रूपमा हिंसात्मक बन्दै गएको छ,’’ एक वरिष्ठ प्रहरीले बताएकाे नेपाल प्रेसले लेखेकाे छ ।
राजनीतिक पृष्ठभूमि र ‘नेपो किड्स’ विवाद
प्रभु साह मधेश राजनीतिका चर्चितसँगसँगै विवादित पात्र पनी हुन् । पूर्व नेकपा (माओवादी) नेता साह पटकपटक सांसद र मन्त्री बनेका थिए । एमाले प्रवेश र पुनः बहिर्गमनपछि २०७९ को चुनावमा स्वतन्त्र उम्मेदवारका रूपमा निर्वाचित भएका थिए ।
साहका छोरालाई स्वतन्त्र आन्दोलनको नाममा ‘नेपो किड्स’ भन्दै आलोचना हुँदै आएको छ । उनको नेतृत्वमा प्रधानमन्त्री सुशीला कार्कीको राजीनामा माग्दै सिंहदरबारमा गरिएको हंगामाबारे जेन–जी आन्दोलनका केही अगुवाहरूले नै प्रश्न उठाएका छन् ।
परिवारको राजनीतिक प्रभाव र जेन–जी भ्रातृ संगठन
विकेशकी आमा रानीकुमारी साह रौतहटको मौलापुर नगरपालिकाको मेयर हुन् । उनले २०७४ र २०७९ दुवै स्थानीय तह चुनावमा विजयी हुँदै परिवारको राजनीतिक प्रभावलाई थप बलियो बनाएकी छन् ।
विकेशले केही महिनाअघि आफ्ना बुबा प्रभु साहलाई प्रमुख अतिथि बनाएर जेन–जी भ्रातृ संगठन गठन गरेका थिए । यही संगठनका सदस्यहरू हालका हिंसात्मक गतिविधिमा प्रयोग भइरहेको प्रहरीको प्रारम्भिक निष्कर्षमा उल्लेख छ ।
हिंसात्मक घटनामा संलग्नता
भदौ २३ र २४ मा काठमाडौंका विभिन्न ठाउँमा भएका आगजनी तथा तोडफोड घटनामा विकेशको सक्रियता पुष्टि भएको सिंहदरबार प्रहरीले जनाएको छ । संसद भवन, सिंहदरबार, भैंसेपाटीस्थित मन्त्री निवास, एमाले कार्यालय लगायत स्थानमा आगजनी गर्न पुगेको उनको फोटो र भिडियो प्रहरीसँग सुरक्षित छ ।
विकेशले केही फोटो र भिडियो आफ्नै फेसबुकमा राखेको पाइए पनि पछि धेरै सामग्री हटाएको प्रहरीले बताएको छ । तर हटाइएको सामग्रीसमेत प्रहरीको डिजिटल फरेन्सिक टोलीले पुनः प्राप्त गरेको एक अधिकारीले जानकारी दिएका छन् ।
आन्दोलनमा कबाडी समूहको प्रयोग
काठमाडौं महानगरपालिकाले हटाएका सडक कबाडी समूहका व्यक्तिहरूलाई समेत उनीहरूले जेन–जी आन्दोलनमा आगजनी र लुटपाटमा संलग्न गराएको पाइएको छ । ‘‘नेपालगञ्ज, रौतहट, धनुषा र काठमाडौँका केही संगठित समूहलाई आन्दोलनका नाममा परिचालन गरिएको प्रमाण देखिएको छ,’’ एक अनुसन्धान अधिकारीले बताएका छन् ।
प्रहरीले घटनासँग सम्बन्धित सबै प्रमाणगत विवरण गृह मन्त्रालयमा पठाएको छ । भने, प्रहरीहरूलाई थप सतर्कता र निगरानी कडा पार्न निर्देशन दिइएको जनाएकाे छ ।
