वीरगंज । समुद्रीमार्ग हुँदै तेस्रो मुलुकबाट आयात हुने सामान वीरगंजसम्म रेल्वे वा ट्रक कन्टेनरमार्फत ल्याउने क्रममा भारतीय झारखण्ड र बिहार राज्यका प्रहरीले अनावश्यक झन्झट तथा जरिवाना असुली गर्ने गरेको गुनासो नेपाली आयातकर्ताले गरेका छन् ।
भार बढी भएको, कन्टेनरको उचाइ बढी देखिएको जस्ता बहानामा प्रहरीले ढुवानीकर्तालाई रोकेर दुःख दिने, अतिरिक्त जरिवाना तिराउने तथा ढुवानीमा ढिलाइ गराउने गरेको आयातकर्ताको आरोप छ ।
नेपाल कार्गो ह्यान्डलिङ एजेन्ट एसोसिएसन कोलकाताका सचिव महेन्द्रकुमार दुगडका अनुसार कोलकाता–वीरगंज मार्गमा मालबाहक ट्रक आवतजावत गर्दा झारखण्ड र बिहार प्रहरीले विभिन्न बहानामा बाधा खडा गर्दै असहज बनाएको छ ।
यस विषयमा नेपाली महावाणिज्य दूतावास कोलकाताका महावाणिज्यदूत झक्कप्रसाद आचार्यले व्यापारी तथा व्यवसायीबाट पटक–पटक गुनासो आउने गरेको उल्लेख गर्दै दूतावासको अधिकार क्षेत्र कोलकाताभित्र मात्र सीमित भएकाले प्रभावकारी हस्तक्षेप गर्न नसकिएको स्पष्ट पारे ।
हाल हल्दिया तथा कोलकाता बन्दरगाहमार्फत नेपालका लागि आउने तेस्रो मुलुकका सामान रेलवे ट्याङ्कर र ट्रक कन्टेनरबाट ढुवानी हुने गर्छ । कोलकाता बन्दरगाहबाट झन्डै ६० प्रतिशत मालसामान रेलवे र ४० प्रतिशत ट्रक कन्टेनरबाट नेपाल आउँछ ।
नेपालका लागि भारत सरकारले सुविधा दिएको दुई बन्दरगाहमध्ये कोलकाताको समन्वय कोलकातास्थित नेपाली महावाणिज्य दूतावासमार्फत र विशाखापत्तनम बन्दरगाहको समन्वय दिल्लीस्थित नेपाली राजदूतावासमार्फत हुने गरेको छ ।
विशाखापत्तनम कोलकातादेखि दुरीमा झन्डै दोब्बर टाढा रहेको कारण अधिकांश आयातकर्ताले कोलकाता पोर्टलाई प्राथमिकता दिने गरेका छन् । नेपालमा हुने तेस्रो मुलुकका आयातमध्ये करिब ७० प्रतिशत कोलकाता पोर्टमार्फत नै भित्रिने तथ्याङ्क छ ।
