भक्तपुर । आम जनता पार्टी (आजपा)का अध्यक्ष तथा पूर्वमन्त्री प्रभु साहले मुलुकमा बढ्दो राजनीतिक संकटबाट निस्कनको एक मात्र विकल्प समयमै निर्वाचन गरिनु पर्ने बताएका छन् । शनिबार भक्तपुरको राधेराधेमा आयोजित आजपा भक्तपुर–२ स्तरीय भेलालाई सम्बोधन गर्दै साहले तोकिएकै समयमा निर्वाचन गराउन सरकार बाध्य हुनुपर्ने धारणा राखे ।
अध्यक्ष साहले प्रधानमन्त्री सुशील कार्की र एमाले अध्यक्ष केपी शर्मा ओली दुवैले मुलुकलाई ‘महासंकट’ तर्फ धकेलेको आरोप लगाए। उनले जेन–जी आन्दोलनप्रति बेवास्ता गर्दै सरकार र एमाले नेतृत्वले आन्दोलनकारीमाथि दमन गरेको दाबी गरे ।
“जेनजी विद्रोहले व्यवस्थाको अन्त्य र भ्रष्टाचारविरुद्ध कारबाही मागेको थियो, तर सरकारले माग नै सम्बोधन गर्न सकेन,” साहले भने, “जेनजीको बलमा सरकार चलाउने, तर जेनजीलाई थुन्ने र गिरफ्तारी गर्ने—यसले सरकारको असफलता साबित भएको छ ।”
साहले भदौ २३ र २४ का दिन सुशीला कार्की, ओमप्रकाश अर्याल, कुलमान घिसिङलगायतको भूमिका ‘जेनजी जनविद्रोहको अपहरण’ जस्तै देखिएको तर्क गरे ।
गृहमन्त्री ओमप्रकाश अर्यालको कार्यक्षमता कमजोर भएको उल्लेख गर्दै साहले यस्तो नेतृत्वमा शान्ति–सुरक्षा कायम हुन नसक्ने टिप्पणी गरे । उनले जाँचबुझ आयोगले टीओआरअनुसार काम नगरेको, कार्यअवधि सकिन लाग्दा पनि ‘दोषी ठहरिएका’सँग बयानसम्म लिन नसकिएको भन्दै आयोगलाई पनि निकम्मा आरोप लगाए ।
अध्यक्ष साहले सुशीला सरकारलाई २१ फागुनमा हुने निर्वाचन सफल बनाउन शान्ति, सुरक्षा र अमनचयनमा ध्यान केन्द्रित गर्न सुझाव दिए ।
कार्यक्रम आजपा भक्तपुर–२ का क्षेत्रीय अध्यक्ष नरेश खड्गीको अध्यक्षतामा सम्पन्न भएको थियो । कार्यक्रममा सहअध्यक्ष तथा संविधानसभा सदस्य तिलक थापा मगर, संगठन विभाग प्रमुख त्रिभुवन साहलगायतको उपस्थिति रहेको थियो ।
भेलाले नरेश खड्गीको नेतृत्वमा ५१ सदस्यीय क्षेत्रीय समिति गठन गरेको छ । समितिमा उपाध्यक्षमा दिनेश साह, कुन्ती थापा मगर, मनोज यादव, सचिवमा कोशिला कुमारी, सहसचिवमा निर्मला मगर र उषा शर्मा, कोषाध्यक्षमा सुभी धिमाल लगायत रहेको इन्चार्ज लखिन्द्र साहले जानकारी दिए ।
