सप्तरी । ‘प्रविधिको प्रयोग गरौँ, लैंगिक हिंसा अन्त्य गरौँ’ भन्ने नारासहित ३४औँ अन्तर्राष्ट्रिय लैंगिक हिंसा विरुद्ध १६ दिने अभियान अन्तर्गत राजविराज–१, चनौरा पडरियामा बिहीबार धर्मगुरूहरूसँग बालविवाह न्यूनीकरणका विषयमा अन्तरक्रिया कार्यक्रम सम्पन्न भएको छ ।
बालविवाह विरुद्ध प्रदेश स्तरीय सञ्जालको सहयोग, परिकल्पना नेपाल सप्तरी तथा जिल्ला प्रहरी कार्यालयको समन्वयमा आयोजना गरिएको कार्यक्रममा सहभागी धर्मगुरूहरूले स्थानीय तहमा बालविवाह नियन्त्रणका लागि छुट्टै नीति निर्माण गर्नुपर्ने सुझाव दिएका छन् ।
कार्यक्रममा मौलाना मो. अल्लाउद्दिनले विवाह गर्नुअघि सम्बन्धित वडाबाट अनिवार्य सिफारिस लिनुपर्ने व्यवस्था लागू भए बालविवाह रोकथाममा ठूलो प्रभाव पर्ने बताए । उनले कतिपय वडा अध्यक्षले उमेर नपुग्दासम्मै नागरिकता बनाएर बालविवाहलाई कमजोरी ढंगले प्रोत्साहन दिने गरेकाले समस्या झन् गम्भीर बनेको बताउनुभयो ।
सोही अवसरमा पण्डित मुक्तिनाथ झाले कानुन एकातिर र व्यवहार अर्कातिर भएकाले समस्या उत्पन्न भएको उल्लेख गर्दै सबै व्यक्ति नैतिकवान बने बालविवाह आफैं घट्ने धारणा राखे। उनले कानूनको सबैले ईमानदारीपूर्वक पालना गर्नुपर्नेमा जोड दिए ।
राजदेवी मन्दिरका पुजारी भोला नाथ चौधरीले विवाह गराउँदा उमेरलाई प्राथमिकता दिने गरेको बताउँदै बालविवाह विशेष गरी दलित तथा सिमान्तकृत समुदायमा बढी हुने भएकाले त्यस्ता बस्तीहरूमा लक्षित हस्तक्षेप आवश्यक रहेको टिप्पणी गरे ।
परिकल्पना नेपालकी उपाध्यक्ष सुनिता परियारको अध्यक्षतामा सम्पन्न कार्यक्रममा नरेश चौधरीले सहजीकरण गरेका थिए । कार्यक्रममा २५ जना पण्डित तथा मौलानाको सहभागिता रहेको थियो। संस्थाकी सदस्य सवाना प्रविणले स्वागत गरेकी थिइन् भने सञ्चालन कार्यक्रम संयोजक रीमा चौधरीले गरेकी थिइन् ।
