काठमाडौँ, मंसिर २४ गते: आगामी फागुन २१ गते हुने प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीका लागि १०० राजनीतिक दलले निर्वाचन आयोगमा आवेदन दिएका छन् ।
निर्वाचन आयोगका अधिकारीहरूले जानकारी दिनुभयो, आयोगले तोकेको समयसीमा भित्र विभिन्न दलहरूले दल दर्ताका लागि निवेदन पेश गरेका हुन् । मंसिर २१ देखि २३ गतेसम्म समानुपातिक निर्वाचन प्रयोजनका लागि दल दर्ता खुला गरिएको थियो । सो अवधिमा संयुक्त र एकल चुनाव चिन्ह राखेका गरी जम्मा एक सय दलले आवेदन दिएका छन् ।
आयोगले प्रस्तुत भएका आवेदनहरूको आवश्यक छानबिन र अध्ययन गरी मंसिर २६ गतेसम्म स्वीकृति दिने कार्यतालिका बनाएको छ । दल दर्ता स्वीकृत भएपछि आगामी पुस १३ र १४ गते समानुपातिकतर्फको बन्द सूची पेश गर्नुपर्नेछ ।
सम्बन्धित सूचीहरूको अध्ययन र विश्लेषणपछि आयोगले माघ ४ गते प्रारम्भिक सूची सार्वजनिक गर्नेछ । दाबी–विरोध तथा आवश्यक अनुसन्धान पूरा गरी माघ २० गते अन्तिम सूची प्रकाशित गरिने कार्यसूचीमा उल्लेख छ ।
कुल २७५ सदस्यीय प्रतिनिधिसभामा प्रत्यक्षतर्फ १६५ र समानुपातिकतर्फ ११० सदस्य निर्वाचित हुने प्रावधान छ ।
समानुपातिक प्रणालीमा यस वर्षको व्यापक सहभागिता राजनीतिक दलहरूको सक्रियता र चुनाव तयारीको संकेतका रूपमा हेरिएको छ ।
