राष्ट्रपति रामचन्द्र पौडेलले जनताले सुम्पिएको जिम्मेवारीलाई अन्तस्करणबाटै बोध गर्दै सबै मिलेर देश विकासमा समर्पित हुन आह्वान गर्नुभएको छ । त्यसका लागि नवीन सोच, शैली र योजना आवश्यक रहेको उल्लेख गर्दै ती योजनालाई कार्यान्वयन गर्न दृढ अठोट, ऊर्जा, आचरणशील र चरित्रवान् नेतृत्वको खाँचो रहेको उहाँले औँल्याउनुभयो ।
३१औँ महानगर दिवसका अवसरमा सोमबार काठमाडौंमा आयोजित कार्यक्रममा सम्बोधन गर्दै राष्ट्रपति पौडेलले सङ्घीय लोकतान्त्रिक गणतन्त्रमा जनताको विश्वास र अपेक्षालाई आत्मसात् गर्दै अघि बढ्नुपर्नेमा जोड दिनुभयो ।
“इतिहासबाट अनुभव, पाठ र शिक्षा लिएर वर्तमानको चाहना र आवश्यकता सम्बोधन गर्दै भावी सन्ततिलाई समृद्ध नेपाल सुम्पिने दायित्व हाम्रो काँधमा छ । यो दायित्व पूरा गर्न हामी चुक्न हुँदैन,” राष्ट्रपति पौडेलले भन्नुभयो ।
उहाँले राजनीति कुनै पेशा वा व्यवसाय नभई समाजसेवाको उत्कृष्ट माध्यम हो भन्ने भावना सबैमा जागृत हुन आवश्यक रहेको बताउनुभयो । “नेपाली जनताले हामीसँग अहिले यही अपेक्षा गरेका छन्,” उहाँले भन्नुभयो । युवा पुस्ताका आन्दोलनहरूमा प्रकट भएको चाहना पनि यही रहेको राष्ट्रपति पौडेलको भनाइ थियो ।
राष्ट्रपति पौडेलले मुलुकसामु विद्यमान समस्याको समाधानका लागि जनताको अभिमत लिनु लोकतन्त्रको सर्वोच्च विधि भएको उल्लेख गर्दै आगामी प्रतिनिधिसभा सदस्य निर्वाचनलाई सफल बनाउन सबैलाई अपिल गर्नुभयो । “युवा पुस्ताले चाहेको परिवर्तनलाई मूर्तरूप दिन फागुन २१ गते प्रतिनिधिसभा सदस्यको निर्वाचन हुँदैछ । यसलाई सफल पार्दै सामाजिक न्याय र सुशासनमार्फत समृद्ध नेपाल निर्माणको अभियानमा सहभागी बनौँ,” उहाँले आग्रह गर्नुभयो ।
काठमाडौं महानगरपालिकाले सम्पादन गरेका काम, प्रवाह गरेका सेवाहरू र विस्तार गरेको सम्बन्धले स्थानीय सरकारका रूपमा जिम्मेवारीबोध प्रस्ट देखाएको राष्ट्रपति पौडेलको भनाइ थियो । आर्थिक, सामाजिक, भौतिक विकास र सहरी व्यवस्थापनमा देखाएको नवीनता र सक्रियता प्रशंसनीय रहेको उल्लेख गर्दै उहाँले युवा नेतृत्व र ऊर्जाशील जनप्रतिनिधिको सक्रियता सार्थक रहेको बताउनुभयो ।
सहरी सुव्यवस्थापन, नदी तथा जल प्रणाली संरक्षण, हरियाली प्रवर्द्धन, प्राकृतिक सम्पदा, मठमन्दिर, तलाउ, पोखरी, ढुंगेधारालगायत भौतिक सम्पदाको अस्तित्व पुनःस्थापना तथा एकीकृत सहरी विकासका प्रयास महानगरपालिकाका उदाहरणीय काम भएको राष्ट्रपति पौडेलले उल्लेख गर्नुभयो ।
त्यसैगरी सूचना तथा सञ्चार प्रविधिको उच्चतम प्रयोग, विद्युतीय शासन, एकीकृत प्रणालीमार्फत पारदर्शी र उत्तरदायी सेवा, एकल सेवा केन्द्र र गुनासो व्यवस्थापन प्रणालीले महानगरपालिकालाई नागरिकमैत्री र उत्तरदायी बनाएको उहाँको भनाइ थियो । “यसले नागरिकको आँगनको सरकार स्थानीय शासनका लागि सबल बनेको सन्देश दिएको छ,” राष्ट्रपति पौडेलले भन्नुभयो ।
काठमाडौं राजनीतिक परिवर्तन र शासकीय रूपान्तरणको अनुभूति गर्ने सहर भएकाले यहाँका नीति, योजना, कार्यक्रम र अनुभव अन्य पालिकाका लागि पनि उदाहरणीय हुने उहाँको धारणा थियो । राजधानी सहरको समृद्धिका लागि महानगरपालिकाले बनाएका नीति, योजना र कार्यक्रम कार्यान्वयनमा सङ्घ र प्रदेश सरकारसहित सबै निकायको सहकार्य आवश्यक रहेको राष्ट्रपति पौडेलले बताउनुभयो ।
महानगर दिवसका अवसरमा विभिन्न विधामा विशिष्ट योगदान पुर्याउने व्यक्तित्वहरूलाई राष्ट्रपति पौडेलले सम्मान गर्नुभएको थियो भने उत्कृष्ट काम गर्ने जनप्रतिनिधिलाई उपराष्ट्रपति रामसहाय प्रसाद यादवले पुरस्कार प्रदान गर्नुभएको थियो । कार्यक्रममा उपराष्ट्रपति यादव, सभामुख देवराज घिमिरे, राष्ट्रिय सभाका अध्यक्ष नारायण दाहाललगायत विशिष्ट व्यक्तित्वहरूको सहभागिता रहेको थियो ।
