पर्साको जीराभवानी गाउँपालिकामा समाचार सङ्कलनका क्रममा पत्रकारमाथि दुव्र्यवहार भएको घटनाको विरोधमा प्रेस चौतारी नेपाल पर्साले प्रमुख जिल्ला अधिकारी (प्रजिअ) भोला दाहाललाई ज्ञापन पत्र बुझाएको छ ।
गत बुधबार जीराभवानी गाउँपालिकामा समाचार सङ्कलनका लागि पुगेका फेमस नेपाल सन्देश साप्ताहिकका प्रकाशक तथा प्रेस चौतारी नेपाल पर्साका सदस्य पत्रकार शैलेश साह गुप्तामाथि त्यहाँका केही कर्मचारीले दुव्र्यवहार गरेको आरोप छ । उक्त घटनाको विरोधमा प्रेस चौतारी नेपाल पर्साका अध्यक्ष निरन्जन मिश्रको नेतृत्वमा सञ्चारकर्मीहरूको टोली सोमबार जिल्ला प्रशासन कार्यालय, पर्सा पुगेको हो ।
टोलीले प्रजिअ दाहाललाई घटनाबारे जानकारी गराउँदै पत्रकार गुप्तामाथि दुव्र्यवहार गर्ने कर्मचारीलाई अविलम्ब कारबाही गर्न माग गरेको छ । प्रेस चौतारीका अनुसार जीराभवानी गाउँपालिकाका कर्मचारी जितेन्द्र मिश्र र इन्द्रजीत हजरालगायतले पत्रकार गुप्तामाथि अपशब्द प्रयोग गर्दै मोबाइल फोन खोसेर खिचिएका तस्बिरहरू समेत मेटिदिएका थिए ।
कार्यालय समयमा कर्मचारीहरू अनुपस्थित रहेको अवस्थाको फोटो खिच्ने क्रममा उक्त दुव्र्यवहार भएको प्रेस चौतारीले जनाएको छ । घटनाको गम्भीरता देखेपछि प्रजिअ दाहालले जीराभवानी गाउँपालिकाका सम्बन्धित कर्मचारी मिश्र र हजरालाई मौखिक आदेश दिँदै सिसिटिभी फुटेजसहित जिल्ला प्रशासन कार्यालय, पर्सामा उपस्थित हुन निर्देशन दिएका छन् ।
डेलिगेशनमा प्रेस चौतारी नेपाल पर्साका अध्यक्ष निरन्जन मिश्रसहित विजय (तुलसी) भण्डारी, किरण सत्याल, नेपाल पत्रकार महासंघ पर्साका सहसचिव एसके चौरसिया, शैलेश गुप्ता, लक्ष्मी खरेल, राजन रौनियार, राजन सिंह, दिपेन्द्र बिसी, कन्हैया गुप्ता, रामजी यादव, मृत्युन्जय साह, अभिलाष गुप्ता, कृष्णा श्रीवास्तव, विजय साह, पानालाल साहलगायत सञ्चारकर्मीहरूको सहभागिता रहेको थियो ।
यसैबीच नेपाल पत्रकार महासंघ पर्सा शाखाले पनि घटनाप्रति ध्यानाकर्षण जनाउँदै प्रेस विज्ञप्ति जारी गरेको छ । महासंघ पर्साका सचिव विजयकुमार महतोद्वारा जारी विज्ञप्तिमा समाचार सङ्कलनका क्रममा सञ्चारकर्मीमाथि भएको अभद्र व्यवहारको भत्र्सना गर्दै घटनाको सत्यतथ्य छानबिन गरी दोषीमाथि अविलम्ब कारबाहीको माग गरिएको छ ।
विज्ञप्तिमा नागरिकको सुसूचित हुने अधिकारको रक्षा गर्न सञ्चारकर्मी तथा समग्र सञ्चार क्षेत्रको सुरक्षाप्रति सरोकारवाला निकाय संवेदनशील बन्नुपर्नेमा पनि जोड दिएको छ ।
