नेपाल राष्ट्र बैंकका गभर्नर डा. विश्वनाथ पौडेलले देश छोडेर विदेश जानुले सबै समस्या समाधान नहुने स्पष्ट पारेका छन् । नेपाल राष्ट्र बैंक वीरगञ्ज कार्यालयको आयोजनामा सरोबर पोर्टिको होटलमा भएको सरोकारवालासँगको अन्तक्रियामा सहभागी बैंकर्सको प्रश्नको जवाफ दिँदै उनले यस्तो बताएका हुन् ।
डा. पौडेलले बैंकर्सलाई चेतावनी दिनु हुँदै भने–“बैंकर्स भनेको राम्रै तलब सुविधा खाने, शिक्षित वर्ग हो, तर तपाईंहरूले समाज र देशको हितमा चुनौतीपूर्ण परिस्थितिमा पनि काम गर्नुपर्छ । देश छोडेर जाँदा सबै ठीक हुन्छ भन्ने सोच त्याग्नुपर्छ ।”
जेनजी आन्दोलनपछि बैंक तथा वित्तीय संस्थामा कर्जा उठाउने चुनौती बढेको भन्दै बैंकर्सले सोधेका प्रश्नमा उनले जिम्मेवारी र जवाफदेहिता बारे मार्गदर्शन दिए । उनले उद्योगी, व्यवसायी, शिक्षक, सुरक्षाकर्मी सबैले चुनौती भोग्नुपरेको उल्लेख गर्दै निराश नहुने र परिस्थिति बिस्तारै सुधार हुने विश्वास दिलाए ।
डा. पौडेलले सरकारले चालू आवको लागि लचिलो मौद्रिक नीति ल्याएर व्यवसायीलाई कर्जा प्रवाहमा प्रोत्साहित गरेको बताए । विनाधितो रु ७ लाखसम्मको कर्जा बैंकमार्फत उपलब्ध गराउनुपर्नेमा जोड दिए ।
उनले निजगढ–काठमाडौं तीव्रमार्गको छिटो सम्पन्न हुने विश्वास व्यक्त गर्दै मधेस र वीरगञ्ज नाकाको लागि यसले व्यावसायिक लाभ दिने बताए ।
कार्यक्रममा वीरगन्ज उद्योग वाणिज्य सङ्घका अध्यक्ष हरि गौतम, व्यवसायी अशोक वैद्य, ठाकुरराम बहुमुखी क्याम्पसका सहप्राध्यापक इन्दुशेखर मिश्र लगायतले आर्थिक नीति, बजेट वितरण, कर प्रणाली सुधार, र सरकारी सेवा कार्यान्वयनमा सुझाव दिएका थिए ।
कार्यक्रम नेपाल राष्ट्र बैंक वीरगञ्जका निर्देशक सुशील पौडेलको अध्यक्षता र सहायक निर्देशक सन्देश ठाकुरको सहजीकरणमा सम्पन्न भएको थियो । कार्यक्रममा राष्ट्र बैंकका आर्थिक अनुसन्धान विभागका कार्यकारी निर्देशक रामशरण खरेल, उद्योगी, बैंक प्रबन्धक, शिक्षाविद्, अर्थविद् र सञ्चारकर्मीहरुको समेत सहभागिता रहेको थियो ।
