जिल्ला प्रशासन कार्यालय पर्साले सामाजिक तथा धार्मिक सद्भावमा खलल पुर्याउने उद्देश्यले फेसबुक, टिकटक र इन्स्टाग्राममा गरिएका पोष्ट, भिडियो तथा तस्बिरहरूको सूक्ष्म निगरानी भइरहेको जनाएको छ ।
धनुषाको एक मस्जिदमा तोडफोड गरिएको घटनालाई लिएर आइतबार वीरगन्जमा भएको प्रदर्शनपछि उत्पन्न परिस्थितिलाई मध्यनजर गर्दै पर्साका प्रमुख जिल्ला अधिकारी भोला दाहालले आइतबार एक सूचना जारी गरी उक्त जानकारी गराएका हुन् ।
प्रमुख जिल्ला अधिकारी दाहालका अनुसार सामाजिक सद्भावमा खलल पुर्याउने, सामाजिक, धार्मिक वा सांस्कृतिक द्वेष फैलाउने, राष्ट्रिय एकतामा आँच पुर्याउने तथा झुट्टा अफवाह फैलाई कुनै धर्म वा समुदायको सामाजिक मान–मर्यादा मर्दन गर्ने कार्यमा संलग्न व्यक्तिहरूका सामाजिक सञ्जाल गतिविधिहरू कडाइका साथ निगरानीमा राखिएको छ ।
यस्ता गतिविधिमा संलग्न व्यक्तिलाई तुरुन्तै पक्राउ गरी प्रचलित कानुनअनुसार कारबाही गर्न सुरक्षा निकायलाई निर्देशन दिइएको प्रजिअ दाहालले जानकारी दिएका छन् ।
सूचनामा सामाजिक सद्भाव बिगार्ने कार्यसम्बन्धी कानुनी प्रावधानहरू यसप्रकार उल्लेख गरिएको छः
१. मुलुकी अपराध संहिता, २०७४
दफा १५५ (धर्मसम्बन्धी कसूर):
कुनै जात, जाति, सम्प्रदाय वा वर्गको धार्मिक आस्था वा धर्मप्रति घृणा वा अपमान गर्ने नियतले धार्मिक पूजा, प्रार्थना वा पवित्र मानिएका स्थान, वस्तु, मशानघाट वा चिहानमा हानि–नोक्सानी, दुषित वा अपमानजनक कार्य गर्न नहुने व्यवस्था गरिएको छ । यस्तो कसूर गर्ने वा गराउनेलाई तीन वर्षसम्म कैद वा तीस हजार रुपैयाँसम्म जरिवाना वा दुवै सजाय हुन सक्ने व्यवस्था छ ।
दफा १५६ (धार्मिक भावनामा आघात पुर्याउन नहुने):
कसैले लेख, वचन, चिन्ह वा अन्य कुनै माध्यमबाट कुनै जात, जाति, सम्प्रदाय वा वर्गको धार्मिक भावनामा आघात पुर्याएमा त्यस्तो कार्य गर्ने वा गराउनेलाई दुई वर्षसम्म कैद वा बीस हजार रुपैयाँसम्म जरिवाना वा दुवै सजाय हुने प्रावधान रहेको छ ।
२. विद्युतीय (इलेक्ट्रोनिक) कारोबार ऐन, २०६३
दफा ४७:
कम्प्युटर, इन्टरनेट तथा अन्य विद्युतीय सञ्चार माध्यममार्फत सार्वजनिक नैतिकता, शिष्टाचारविपरीतका, घृणा वा द्वेष फैलाउने, विभिन्न जात–जाति तथा सम्प्रदायबीचको सुमधुर सम्बन्धमा खलल पुर्याउने सामग्री प्रकाशन वा प्रदर्शन गरेमा एक लाख रुपैयाँसम्म जरिवाना वा पाँच वर्षसम्म कैद वा दुवै सजाय हुने व्यवस्था गरिएको छ ।
जिल्ला प्रशासन कार्यालय पर्साले सामाजिक सद्भाव, शान्ति र अमनचयन कायम राख्न सबै नागरिकलाई संयमित र जिम्मेवार रूपमा सामाजिक सञ्जाल प्रयोग गर्न आग्रह गरेको छ ।
