नेकपा (एमाले) का अध्यक्ष केपी शर्मा ओलीले अबका बीस वर्षसम्म नयाँ आएका दलहरूले चुनाव जित्न नसक्ने दाबी गरेका छन् ।
नेपाल राष्ट्रिय भूतपूर्व सैनिक तथा प्रहरी सङ्गठनको स्थापना दिवसका अवसरमा बुधबार काठमाडौंमा आयोजित कार्यक्रममा सम्बोधन गर्दै अध्यक्ष ओलीले सरकार चुनाव गराउने वा नगराउने विषयमा अझै अन्योलमा रहेको बताएका हुन् ।
उनले नयाँ दलहरू चुनाव हार्ने अवस्था देखिएपछि सरकार चुनाव नगराउने पक्षमा देखिएको आरोप लगाए । अध्यक्ष ओलीका अनुसार सरकार आफूहरूले हार्ने अवस्थामा मात्रै चुनाव गराउने मनस्थितिमा रहेको छ ।
उनले भने, “एमाले–कांग्रेसले चुनाव जित्ने भए चुनाव नगराउने गरियो, अनि फलानाले जित्छ भने मात्र चुनाव गराउने गरियो । फलाना–फलानाले अबका बीस वर्षसम्म चुनाव जित्दै छन् । के त्यसो भए अब बीस वर्षसम्म चुनाव नै नगराउने ? चुनाव गर्नु वा नगर्नु फरक कुरा हो ।”
अध्यक्ष ओलीले यदि आफूहरूले चुनाव जित्ने कुरा मात्रैको आधारमा सरकारले निर्वाचन नगराउने हो भने, बरु सरकारले आफूहरू चुनाव हार्छौँ भनेर खुलेर भन्नुपर्ने बताए । अझै पनि एमाले र कांग्रेस एक भएर चुनावमा जाने निर्णय गरे तोकिएको समयमा निर्वाचन गर्न नदिने धम्की सुनिन थालेको उनको भनाइ थियो ।
अध्यक्ष ओलीले वर्तमान सरकार चुनावी वातावरण बनाउन छाडेर हेटौँडामा घर भत्काउने काममा लागेको आरोप लगाए। उन्माद र नशामा देश निर्माण हुन नसक्ने भन्दै देश बनाउन सही व्यक्ति आवश्यक रहेको उनले उल्लेख गरे ।
त्यस्तै, उनले असंवैधानिक तवरले सरकार गठन भएको र संसद् विघटन गरिएको दोहोर्याउँदै प्रतिगमन सच्याउन संसद् पुनःस्थापना हुनैपर्नेमा जोड दिए ।
अध्यक्ष ओलीले भदौ २३ र २४ गतेका घटना लामो समयदेखिको योजनाको परिणाम भएको दाबी गर्दै ती घटनामा जनेजी युवाहरूको कुनै भूमिका नरहेको बताए । उनले देशद्रोही तथा अपराधी तत्वहरूले तोडफोड र आगजनी गरेको आरोप लगाए ।
