निर्वाचन आयोगले निर्वाचनमा खटिने कर्मचारीहरूका लागि प्रतिव्यक्ति २० लाख रुपैयाँ बराबरको दुर्घटना बीमा व्यवस्था गरेको छ ।
आयोगका अनुसार देशभर चुनावमा खटिने २ लाख १३ हजार १ सय ६१ जना कर्मचारीका लागि उक्त बीमा गरिएको हो । मतदान केन्द्र तथा मतगणनास्थलमा खटिने कर्मचारीहरूका लागि १५ दिन अवधिको दुर्घटना बीमा व्यवस्था गरिएको आयोगले जनाएको छ ।
त्यसैगरी, मुख्य निर्वाचन अधिकृत तथा निर्वाचन अधिकृतको कार्यालयमा खटिने कर्मचारी, आयोगका केन्द्रीय तथा जिल्ला कार्यालयमा कार्यरत कर्मचारी र निर्वाचनका बेला काजमा खटिने कर्मचारीहरूका लागि भने ९० दिन अवधिको बीमा गरिएको छ ।
चुनावी प्रक्रियामा संलग्न कर्मचारीहरूको सुरक्षा र मनोबल बढाउने उद्देश्यले यो व्यवस्था गरिएको आयोगको भनाइ छ ।
