राष्ट्रिय स्वतन्त्र पार्टी (रास्वपा) पर्साले पर्सा निर्वाचन क्षेत्र नं. १ का सक्रिय सदस्यहरूसँग भेटघाट तथा अन्तरक्रिया कार्यक्रम सम्पन्न गरेको छ ।
कार्यक्रममा पर्सा जिल्लाका चारै निर्वाचन क्षेत्रका रास्वपा उम्मेदवारलाई विजयी गराउन सक्रिय सदस्यहरूको भूमिका कस्तो हुनुपर्छ भन्ने विषयमा गहन छलफल र अन्तरक्रिया गरेको हाे । छलफलका क्रममा विभिन्न तह र तप्काबाट आएका सहभागीहरूले आ–आफ्ना दृष्टिकोण र सुझाव प्रस्तुत गरेका थिए । कार्यक्रममा उठेका विषयहरूलाई सम्बोधन गर्दै रास्वपा पर्सा सभापति तथा पर्सा निर्वाचन क्षेत्र नं. १ का प्रतिनिधिसभा उम्मेदवार हरि पन्तले प्राप्त भएका जायज सुझावहरू पार्टीले सहर्ष स्वीकार गर्ने बताए ।
उनले फागुन २१ गते हुने निर्वाचनमा नेपाली जनताले वर्षौंदेखि जरा गाडेर बसेको भ्रष्टाचार, कुशासन, अनियमितता, नातावाद र कृपावादविरुद्ध मतपत्रमार्फत जवाफ दिने विश्वास व्यक्त गरे । सभापति पन्तले कार्यक्रममा देखिएको उल्लेख्य पार्टी सदस्यहरूको उपस्थिति आफू र पार्टीका लागि हौसला बनेको उल्लेख गर्दै पर्साका चारै निर्वाचन क्षेत्रमा रास्वपाको जित सुनिश्चित हुने दाबी गरेका थिए । सयौँ रास्वपा शुभेच्छुकहरूको सहभागिता रहेको उक्त कार्यक्रममा जिल्ला सचिव सुदिश प्रजापति, क्षेत्रीय सभापति राम आर्या, फैयाद मियाँलगायतका नेताहरूको उपस्थिति रहेको थियो ।
कार्यक्रम सहसचिव कृष्ण पासवानले सञ्चालन गरेका थिए भने वीरगंज महानगर सभापति अमन आलमको सभापतित्वमा सम्पन्न भएको थियो ।
