संयुक्त अरब इमिरेट्स (यूएई) सरकारले २६७ जना नेपाली बन्दीलाई आममाफी दिएको छ ।
यूएई सरकारको ५४औँ राष्ट्रिय दिवस (ईद अल एतिहाद) को अवसरमा उनीहरूलाई आममाफी दिइएको हो ।
नेपाल सरकारले यस आममाफीप्रति यूएई सरकारप्रति कृतज्ञता व्यक्त गरेको छ । परराष्ट्र मन्त्रालयको निर्देशनअनुसार आबुधाबीस्थित नेपाली दूतावासले पटक–पटक गरेको अनुरोधको प्रत्युत्तरस्वरूप यूएई सरकारले आममाफीको निर्णय गरेको विज्ञप्तिमा उल्लेख गरिएको छ ।
आममाफी पाएका नेपाली नागरिकविरुद्ध अन्य कुनै बाँकी कानुनी मुद्दा वा प्रतिबन्ध नरहेको अवस्थामा यूएईको प्रचलित कानुनअनुसार आवश्यक प्रक्रिया पूरा गरेपछि स्वदेश फर्कन सक्नेछन् ।
