नेकपा एमालेका उपाध्यक्ष रामबहादुर बादलले निर्वाचनलाई युद्धको संज्ञा दिँदै पार्टीका कार्यकर्तालाई “योद्धा” को रूपमा निर्वाचन मैदानमा सक्रिय हुन निर्देशन दिएका छन् ।
पर्सा जिल्ला कमिटीले आयोजना गरेकाे जिल्ला स्तरीय कार्यकर्ता भेलालाई वीरगंज नगरसभागृहमा सम्बोधन गर्दै उपाध्यक्ष बादलले राष्ट्रिय स्वतन्त्रता र पहिचानसँग निर्वाचनको प्रत्यक्ष सम्बन्ध रहेको बताए ।उनले डिपस्टेटवालाहरूले गरेका प्रतिगामी घटनाका कारण पार्टीको अस्तित्वमा प्रश्न उठेको उल्लेख गर्दै, आफ्नो अस्तित्व रक्षाका लागि निर्वाचन जित्नै पर्ने अवस्था रहेको बताए । उपाध्यक्ष बादलले पार्टी अध्यक्ष के.पी. ओलीको नेतृत्वमा देशभक्त र लोकतान्त्रिक सरकार पुनर्स्थापना गर्न चुनाव जित्न आवश्यक रहेको जोड दिए। उनले इतिहासले ल्याएका प्रश्नहरूको सही जवाफ नेकपा एमालेले दिने बताए।
बादलले संकटमा परेको मुलुकलाई निकास दिन नेकपा एमालेले चुनाव जित्नु अनिवार्य रहेको भन्दै सूर्यध्वजाबाहक उम्मेदवारलाई जिताउन कार्यकर्तालाई एकताको साथ सक्रिय हुन निर्देशन दिएका हुन् ।कार्यक्रममा एमालेका जिल्ला अध्यक्ष डा. विश्वम्भर शर्मा, केन्द्रीय सदस्य प्रभू हजरा, बिजयकुमार सरावगी, प्रदेश अध्यक्ष चन्देश्वर मण्डल, उपाध्यक्ष बिचारी यादव, सचिव मनोज पौडेल, पर्सा क्षेत्र नं. १ का उम्मेदवार प्रदिप यादव , पर्सा २ का उम्मेदवार रिमा यादव, पर्सा ३ का उम्मेदवार रुपेश पाण्डे, पर्सा ४ का उम्मेदवार जालिम मियाँ, वीरगंज महानगर प्रमुख राजेशमान सिंह, बहुदरमाईका प्रमुख सिंहासन साह तेली, प्रदेश सभा सदस्य प्रमोद जयसवाल, बिना शर्मा, ठाकुर न्यौपाने लगायतका नेताहरूको पनि उपस्थिती रहेको थियो।
