मुम्बईको छत्रपति शिवाजी महाराज अन्तर्राष्ट्रिय विमानस्थलमा मंगलबार साँझ साढे ७ बजे दुई जहाजको पखेटा आपसमा ठोक्किएको घटना भएको छ । इन्डिगो र एयर इन्डियाका विमानबीच भएको यो घटनामा सबै यात्रुहरू सुरक्षित रहेका छन् ।
घटनाका अनुसार एयर इन्डियाको फ्लाइट एआई२७३२, जो मुम्बईबाट कोयम्बटूर जाँदै थियो, टेकअफअघि ट्याक्सीवेमा प्रतिक्षा गरिरहेको अवस्थामा इन्डिगोको विमानसँग विंगटिप सम्पर्कमा आएको थियो ।
इन्डिगो प्रवक्ताका अनुसार, हैदराबादबाट मुम्बई आएका उनीहरूको ए३२० विमान अवतरणपछि ट्याक्सीवेतर्फ जाँदै गर्दा एयर इन्डियाको विमानसँग पखेटा ठोक्किएको हो । दुवै एयरलाइन्सका प्रवक्ताले आफ्ना विज्ञप्तिमा यात्रुहरू सबै सुरक्षित रूपमा विमानबाट बाहिर निकालिएको जानकारी दिएका छन् ।
घटनापछि नागरिक उड्डयन प्राधिकरण (DGCA) का अधिकारीहरू मुम्बई विमानस्थल पुगेका थिए र घटनाको निरीक्षण गरेका थिए । वर्तमानमा दुवै विमान प्राविधिक जाँचको लागि रोकिएको छ। DGCA ले प्रारम्भिक जानकारी अनुसार घटनामा कुनै घाइते वा गम्भीर क्षति नभएको जनाएको छ ।
दुवै एयरलाइन्सले यात्रुहरूको सुरक्षामा ध्यान दिइएको र आवश्यक प्रोटोकल अनुसार विमानको जाँच भइरहेको विज्ञप्तिमा उल्लेख गरेका छन् ।
