काठमाडौं । प्रतिनिधिसभा सदस्य निर्वाचनअन्तर्गत राष्ट्रिय स्वतन्त्र पार्टी (रास्वपा) ले समानुपातिकतर्फ उल्लेखनीय मत प्राप्त गरेको छ । प्रत्यक्षतर्फ १२५ सिट जितिसकेको रास्वपाले समानुपातिकतर्फ पनि ५० लाखभन्दा बढी मत प्राप्त गर्दै समग्रतामा दुई तिहाइ नजिक पुगेको छ ।
पछिल्लो अपडेटअनुसार रास्वपाले समानुपातिकतर्फ ५० लाख १४ हजार ८९१ मत प्राप्त गरेको छ। यो परिणामसँगै रास्वपा प्रतिनिधिसभामा सबैभन्दा ठूलो शक्तिका रूपमा स्थापित हुने देखिएको छ ।
समानुपातिकतर्फ दोस्रो स्थानमा रहेको नेपाली कांग्रेसले १६ लाख ९५ हजार २६६ मत प्राप्त गरेको छ भने तेस्रो स्थानमा रहेको नेकपा (एमाले) ले १४ लाख १३ हजार ६९ मत पाएको छ। चौथो स्थानमा रहेको नेकपाले ७ लाख ६७ हजार ३२७ मत प्राप्त गरेको छ ।
त्यसैगरी पाँचौँ स्थानमा रहेको श्रम संस्कृति पार्टीले ३ लाख ५८ हजार ४६८ मत प्राप्त गर्दा राष्ट्रिय प्रजातन्त्र पार्टी (राप्रपा) ले ३ लाख २५ हजार ३७५ मतसहित छैटौँ स्थानमा रहँदै थ्रेसहोल्ड कटाएको छ ।
मतगणना कार्य जारी रहेकाले अन्तिम परिणाम आउन बाँकी छ ।
