सरकारले भदौ २३ र २४ का घटनासम्बन्धी जाँचबुझ आयोगको प्रतिवेदन भोलि ( सोमबार ) सार्वजनिक गर्ने जनाएको छ ।
आइतबार प्रधानमन्त्री निवास बालुवाटारमा बसेको मन्त्रिपरिषद् बैठकपछि सञ्चारकर्मीसँगको कुराकानीका क्रममा गृहमन्त्री समेत रहेका सरकारका प्रवक्ता ओमप्रकाश अर्यालले प्रतिवेदनको विस्तृत विवरण भोलि सार्वजनिक हुने जानकारी दिएका हुन् ।
अर्यालले भने, “प्रतिवेदन अध्ययन गर्नेगरी नेपाल सरकार मन्त्रिपरिषद्ले ग्रहण गर्ने निर्णय यही हो । यो भित्र सबै कुरा समावेश हुन्छ । यसको विस्तृत जानकारी भोलि आउँछ, अहिले होइन ।” जेनजी आन्दोलनबारे गठन गरिएको जाँचबुझ आयोगले तयार पारेको प्रतिवेदनको विषयमा मन्त्रिपरिषद् बैठकमा छलफल भएको थियो । अहिलेसम्म उक्त प्रतिवेदन सार्वजनिक गरिएको छैन ।
प्राप्त विवरण अनुसार, प्रतिवेदनमा तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक, तत्कालीन प्रहरी प्रमुख चन्द्रकुवेर खापुङ लगायतका व्यक्तिहरूलाई फौजदारी अनुसन्धानका लागि सिफारिस गरिएको छ ।
सार्वजनिक प्रतिवेदनको मागसहित दबाब बढ्दै गएको छ, र सरकारले यसलाई पारदर्शी तरिकाले सार्वजनिक गर्ने तयारी गरेको बताइएको छ ।
