वाणिज्य, आपूर्ति तथा उपभोक्ता संरक्षण कार्यालय वीरगञ्जको नेतृत्वमा आज वीरगञ्जको मुख्य बजार क्षेत्र अन्तर्गत गीता मन्दिर रोड आसपास गरिएको संयुक्त अनुगमनमा सरसफाइ, मूल्यसूची तथा कानुनी कागजातमा लापरबाही गर्ने व्यवसायीमाथि कारबाही गरिएको छ ।
अनुगमन टोलीले विभिन्न होटल तथा रेष्टुरेन्टहरूको निरीक्षण गर्दै मापदण्ड उल्लंघन गर्ने चार वटा व्यवसायलाई कुल २५ हजार रुपैयाँ जरिवाना गरेको हो । अनुगमनका क्रममा फुड गार्डेन, लक्ष्मी सेकुवा होटल, नेवा सेकुवा पसः र सोखिन मःम सेन्टर लगायतका व्यवसायमा खाद्य स्वच्छता, सरसफाइ, मूल्यसूची तथा सञ्चालन मापदण्डको अवस्थाबारे सूक्ष्म रूपमा जाँच गरिएको थियो।
टोलीले विशेषगरी भान्सा क्षेत्रको सरसफाइ, खाद्य सामग्री भण्डारण गर्ने तरिका, प्रयोग हुने पानीको गुणस्तर तथा कर्मचारीहरूको व्यक्तिगत सरसफाइमा विशेष ध्यान दिएको जनाएको छ । निरीक्षणका क्रममा केही व्यवसायले आवश्यक मापदण्ड पूरा नगरेको, मूल्यसूची नराखिएको तथा कानुनी कागजात अद्यावधिक नभएको पाइएपछि तत्काल सुधार गर्न निर्देशन दिँदै जरिवाना गरिएको हो ।
उपभोक्ताको स्वास्थ्यमा प्रत्यक्ष असर पार्ने यस्ता कमजोरीलाई गम्भीर रूपमा लिँदै आगामी दिनमा पनि कडा निगरानी जारी रहने अनुगमन टोलीले जनाएको छ ।
टोलीले व्यवसायीहरूलाई स्वच्छता र गुणस्तरमा कुनै सम्झौता नगर्न आग्रह गर्दै उपभोक्तालाई सुरक्षित तथा स्वस्थ खाद्य सेवा उपलब्ध गराउन सचेत गराएको छ। साथै, मापदण्ड पालना नगरेमा थप कडा कारबाही गरिने चेतावनी समेत दिइएको छ ।
उक्त अनुगमन टोलीमा मधुलेश प्रसाद साह, खाद्य प्रविधि तथा गुण नियन्त्रण कार्यालयका श्रवण कुमार साह, जिल्ला प्रशासन कार्यालय पर्साका ब्रह्मदेव यादव, उपभोक्ता हित संरक्षण मञ्चका अजित भुजेल, वीरगञ्ज उद्योग वाणिज्य संघका मनोज कुमार दास, जिल्ला प्रहरी कार्यालय पर्साका प्रहरी सहायक निरीक्षक रामबाबू प्रसाद यादव तथा सञ्चारकर्मी अभिलाष गुप्तालगायतको सहभागिता रहेको थियो ।
अनुगमन टोलीले यस्ता बजार अनुगमन कार्यक्रमलाई आगामी दिनहरूमा पनि निरन्तरता दिइने जनाएको छ ।
