इरानले अमेरिका र इजरायलसँग युद्धविराम नचाहेको स्पष्ट पारेको छ ।
इरानका विदेशमन्त्री अब्बास अरागचीले जापानी सञ्चारमाध्यम क्योडो न्युजसँगको कुराकानीमा युद्धविरामभन्दा युद्धको स्थायी समाधान आवश्यक रहेको बताएका हुन् ।
उनले भने, “इरान युद्धविराम चाहँदैन, बरु युद्धको पूर्ण, व्यापक र स्थायी अन्त्य चाहन्छ ।”
अरागचीले युद्धलाई पूर्ण रूपमा समाप्त गर्न सक्ने कुनै पनि पहलको स्वागत गर्ने बताए । साथै, इरानमाथि जबरजस्ती संघर्ष थोपारिएको पनि उनको जिकिर थियो ।
उनका अनुसार, युद्ध रोक्ने प्रस्तावहरू सुन्न र त्यसमा विचार गर्न इरान तयार छ। “केही देशहरू मध्यपूर्वमा जारी द्वन्द्व समाधानका लागि प्रयासरत छन्,” उनले भने, “तर अमेरिका आफ्नो आक्रामकता रोक्न तयार देखिँदैन ।”
यसअघि डोनाल्ड ट्रम्पले इरानसँगको युद्ध चाँडै अन्त्य गर्ने लक्ष्यमा आफू रहेको बताएका थिए । सामाजिक सञ्जाल Truth Socialमा पोस्ट गर्दै उनले “हामी लक्ष्य हासिलको अत्यन्तै नजिक छौं” भनेका थिए ।
