बारा जिल्लासँग जोडिएको नेपाल–भारत सीमामा अवैध रूपमा मदिरा तथा गोरु तस्करी गर्ने दुई छुट्टाछुट्टै प्रयास भारतीय सुरक्षाकर्मीले विफल पारेका छन् ।
घटनामा ठूलो परिमाणमा मदिरा तथा दुई वटा गोरुसहित दुई जनालाई पक्राउ गरिएको छ । सशस्त्र सीमा बल (एसएसबी) ७१औँ बटालियन मुख्यालय पिपराकोठिकाका सहायक कमाण्डेन्ट विश्वजित तिवारीका अनुसार शुक्रबार राति करिब ९:३० बजे प्राप्त गोप्य सूचनाका आधारमा समवाय बरहडवाले प्रहरी चौकी जितनासँग समन्वय गरी संयुक्त नाका स्थापना गरिएको थियो ।
त्यसपछि बरहरवा मुख्यालयबाट थप सुरक्षाकर्मी परिचालन गरी सीमा क्षेत्रमा निगरानी कडा पारिएको थियो । सोही क्रममा सीमा स्तम्भ नम्बर ३६७/०२ नजिक, भारततर्फ करिब ४०० मिटर दूरीमा पर्ने बरेला गाउँ आसपास शुक्रबार राति करिब १२:३५ बजे नेपालबाट भारततर्फ सामान बोकेर जाँदै गरेका व्यक्तिहरूलाई शंकास्पद अवस्थामा देखिएको थियो ।
सुरक्षाकर्मीले रोक्न आदेश दिएपछि उनीहरू सामान फालेर भाग्न खोजेका थिए । खेद्ने क्रममा एक जनालाई नियन्त्रणमा लिन सफल भएको र अन्य व्यक्ति अँध्यारोको फाइदा उठाउँदै नेपालतर्फ फरार भएको जनाइएको छ । पक्राउ पर्नेमा भारत, बिहार राज्य पूर्वी चम्पारण जिल्ला अन्तर्गत बेला जितपुर गाउँ निवासी सुधांशु शर्मा रहेका छन् ।
घटनास्थलमा फालिएको सामान जाँच गर्दा जुटका ६ वटा बोराभित्र ‘कस्तुरी (निम्बु फ्रेश)’ ब्रान्डका ३०० एमएलका ५८० बोतल (कुल १७४ लिटर) मदिरा बरामद भएको एसएसबीले जनाएको छ । बरामद मदिरा नियन्त्रणमा लिई आवश्यक कानुनी प्रक्रिया अघि बढाइएको छ भने पक्राउ परेका व्यक्तिलाई थप अनुसन्धानका लागि प्रहरी चौकी जितनामा बुझाइएको छ ।
यसैबीच, अर्को घटनामा पनि बारा जोडिएको सीमाक्षेत्रमा गोरु तस्करी प्रयास विफल पारिएको छ । सशस्त्र सीमा बल को इन्टेलिजेन्स सेटअप ७१ बटालियन मोतिहारीबाट प्राप्त सूचनाका आधारमा बि कम्पनी महुवाको गस्ती टोलीले सीमा स्तम्भ नम्बर ३७५/११ नजिकबाट दुई वटा गोरुसहित एक जनालाई नियन्त्रणमा लिएको हो ।
एसएसबी मुख्यालय पिपराकोठिकाका प्रवक्ता विनित कुमार सिंहका अनुसार पक्राउ पर्नेमा पूर्वी चम्पारण जिल्लाको मसाही गाउँ निवासी मोहम्मद साबिर रहेका छन् । प्रारम्भिक अनुसन्धानअनुसार ती गोरुहरू नेपालबाट भारततर्फ अवैध रूपमा लैजाँदै गरिएको आशंका गरिएको छ ।
बरामद गोरु र पक्राउ परेका व्यक्तिलाई आवश्यक अनुसन्धान तथा कानुनी प्रक्रिया अघि बढाउन महुवा प्रहरी चौकीमा बुझाइएको एसएसबीले जनाएको छ ।
