पूर्व–पश्चिम राजमार्ग अन्तर्गत नवलपुरको गैंडाकोट नगरपालिका–९, हनुमान मन्दिर नजिक भयानक सवारी दुर्घटना भएको छ ।
दुर्घटनामा मानवीय क्षति नभए पनि चालकसहित दर्जनभन्दा बढी व्यक्ति घाइते भएका छन् । घाइतेहरूलाई उपचारका लागि अस्पताल पठाइएको प्रहरीले जनाएको छ ।
जिल्ला प्रहरी कार्यालय नवलपुरका सूचना अधिकारी एवं डीएसपी अनिल पण्डितका अनुसार नेपालगञ्जबाट काठमाडौंतर्फ आउँदै गरेको लुम्बिनी प्रदेश ०१–००१ ख ०९१० नम्बरको बसले गैंडाकोटबाट भेंडाबारीतर्फ जाँदै गरेको बागमती प्रदेश ०१–०२८ च ५००४ नम्बरको हात्तीगाडी र सोही दिशातर्फ गइरहेको बा ३ ख ३१६३ नम्बरको ट्रकलाई ठक्कर दिएको थियो ।
आज बिहान ६:४५ बजे भएको उक्त दुर्घटनामा तीनवटै सवारीका चालक घाइते भएका छन् भने अन्य ८–९ जना यात्रु पनि सामान्य घाइते भएका छन् । घटनाबारे थप विवरण संकलन भइरहेको प्रहरीले जनाएको छ ।
प्रहरीका अनुसार ट्रक चालक रामेछापका ३२ वर्षीय इन्द्र तामाङ, बस चालक बाँकेको नेपालगञ्ज उपमहानगरपालिका–२० निवासी ४१ वर्षीय मोहनसिंह बलामी मगर र हात्तीगाडी चालक चितवनको भरतपुर महानगरपालिका–१२ निवासी ३३ वर्षीय दर्शन काप्री घाइते भएका छन् ।
हात्तीगाडी चालक काप्रीको छातीमा चोट लागेको छ भने बस र ट्रक चालकका दुवै खुट्टामा चोट लागेको छ । तीनै जना चालकहरूको अवस्था मध्यम रहेको प्रहरीले जनाएको छ ।
