शिक्षा मन्त्रालयले एउटै विद्यालयमा एक पटकमात्र भर्ना शुल्क लिन निर्देशन दिएको छ । मन्त्रालयले अध्ययनरत विद्यार्थीबाट पटक-पटक भर्ना शुल्क नलिन र शैक्षिक सत्र सुरु हुनुभन्दा अगाडि भर्ना नगर्न देशभरका विद्यालयहरूलाई चेतावनी दिएको हो ।
मन्त्रालयका उपसचिव कृष्णचन्द्र पोख्रेलद्वारा हस्ताक्षरित पत्रमार्फत संघीय मामिला तथा सामान्य प्रशासन मन्त्रालयलाई पत्राचार गर्दै देशभरका ७५३ वटै स्थानीय तहलाई यसको प्रभावकारी कार्यान्वयन र अनुगमनका लागि अनुरोध गरिएको छ ।
केही विद्यालयले शैक्षिक सत्र सुरु हुनुअगावै विद्यार्थी भर्ना गर्ने, अग्रिम शुल्क असुल गर्ने र स्वीकृत शीर्षकभन्दा बाहिर गएर बढी शुल्क लिने गरेको गुनासो बढेपछि मन्त्रालयले यस्तो कदम चालेको हो ।
पत्रमा शिक्षा नियमावली २०५९ को परिच्छेद १५ उद्धृत गर्दै शैक्षिक सत्र सुरु नभई कसैले पनि विद्यार्थी भर्ना गर्न नपाउने कानुनी व्यवस्थाको स्मरण गराइएको छ । ‘प्रचलित कानुनअनुसार भर्ना भएपश्चात मात्र स्वीकृत शीर्षकमा शुल्क लिन पाइने व्यवस्था हुँदाहुँदै विद्यार्थीबाट अग्रिम र बढी शुल्क असुलिएको, फरक शीर्षकमा रकम लिइएको र एउटै विद्यालयमा कक्षा परिवर्तन हुँदा पुनः भर्ना शुल्क लिइएको पाइएको छ,’ पत्रमा उल्लेख छ ।
साथै, सर्वोच्च अदालतको फैसलालाई आधार मान्दै मन्त्रालयले नियमविपरीत वा कानुनबाहिर लिइएको अग्रिम शुल्क तत्काल सम्बन्धित अभिभावक वा विद्यार्थीलाई फिर्ता गर्न निर्देशन दिएको छ । यदि कुनै विद्यालयले यो निर्देशनको उल्लंघन गरेमा प्रचलित कानुनअनुसार कडा कारबाही गर्न स्थानीय तहहरूलाई अधिकार प्रत्यायोजन गरिएको मन्त्रालयले जनाएको छ ।
