अर्थमन्त्री डा. स्वर्णिम वाग्लेले मुलुकको आर्थिक अवस्थालाई मजबुत बनाउने लक्ष्यसहित आगामी आर्थिक वर्षको बजेट निर्माण भइरहेको बताएका छन् ।
शनिबार काठमाडौंमा बाह्रखरीले आयोजना गरेको आर्थिक परिसंवाद कार्यक्रममा बोल्दै अर्थमन्त्री वाग्लेले सरकारले आर्थिक अवस्था सुदृढ बनाउन बजेट निर्माणमा विशेष ध्यान दिएको बताएका हुन् । उनका अनुसार आर्थिक क्षेत्रलाई चलायमान बनाउन असान्दर्भिक ऐन कानुन खारेज गर्ने र लगानीमैत्री वातावरण तयार गर्ने नीति सरकारको प्राथमिकतामा छ । अर्थमन्त्री वाग्लेले उच्चस्तरीय आर्थिक सुझाव आयोगको प्रतिवेदनलाई पनि बजेट निर्माणमा ध्यानमा राखिएको बताए ।
उनले निजी क्षेत्रलाई विश्वासमा लिएर मात्र आर्थिक विकास सम्भव हुने भन्दै उद्यमी र रोजगारी सिर्जना गर्ने व्यवसायीको सुरक्षामा सरकार प्रतिबद्ध रहेको स्पष्ट पारे । त्यसैगरी निजी सम्पत्तिको सुरक्षा, सम्झौताहरूको कार्यान्वयन र करको भार कम गर्ने गरी नीतिगत सुधार गरिने उनको भनाइ थियो । उनले सुशासनलाई पनि सरकारले गम्भीर रूपमा अघि बढाइरहेको उल्लेख गरे ।
