अर्थमन्त्री डा. स्वर्णिम वाग्लेले सीमा नाकाबाट १ सय रुपैयाँभन्दा माथिको सामानमा भन्सार शुल्क नतिरी ल्याउन नपाइने हालको नियम संशोधन गरिने बताएका छन्।
सरकारले सीमावर्ती भारतीय बजारबाट ल्याइने १०० रुपैयाँभन्दा बढी मूल्यका सामानमा भन्सार महसुल अनिवार्य गरेको छ। तर, यस व्यवस्थाका कारण सामान्य उपभोक्ताले समेत साना सामान ल्याउँदा समस्या भोग्नुपरेको गुनासो उठ्दै आएको छ।
सोही विषयमा मंगलबार अर्थ समितिमा भएको छलफलमा बोल्दै अर्थमन्त्री वाग्लेले सीमामा रहेको उक्त सीमा बढाइने जानकारी दिए। उनले यो नियम वर्तमान सरकारले नबनाएको स्पष्ट गर्दै भने, “यो हामी आएर बनाएको नियम होइन, तर यसको सीमा बढाउँछौं।”
उनले राजस्व चुहावट रोक्न सरकार कडा रहने बताउँदै तस्करी नियन्त्रणमा भने कुनै सम्झौता नहुने स्पष्ट पारे। साथै, घरायसी सामानको नाममा दैनिक धेरै पटक सीमा वारपार गरी सामान ओसारपसार गर्ने प्रवृत्तिमा कडाइ गरिने पनि उनले बताए।
