गर्मी मौसममा शरीरको तापक्रम सन्तुलित राख्न पर्याप्त पानी पिउनु अत्यन्त आवश्यक हुन्छ ।
तर तिर्खा लाग्दा धेरैलाई एउटा प्रश्नले अलमल्याउने गर्छ — फ्रिजको चिसो पानी पिउने कि सामान्य पानी ? वास्तवमा, कुन पानी पिउने भन्ने कुरा तपाईंको शरीरको अवस्था, मौसम र समयअनुसार फरक पर्न सक्छ ।
चिसो पानी पिउँदा के हुन्छ ?
चर्को घामबाट फर्किएपछि वा धेरै पसिना बगेपछि चिसो पानी पिउँदा शरीरले तुरुन्तै राहत महसुस गर्छ । यसले शरीरको तापक्रम छिट्टै कम गर्न मद्दत गर्नुका साथै ताजापन र शीतलताको अनुभूति गराउँछ । तर अत्यधिक चिसो पानी धेरै मात्रामा पिउँदा शरीरका रक्तनलीहरू साँघुरिन सक्छन्, जसले पाचन प्रक्रियामा असर पार्न सक्छ । विशेषगरी शरीर धेरै तातेको अवस्थामा अचानक धेरै चिसो पानी पिउँदा घाँटी दुख्ने, रुघाखोकी लाग्ने, पेट दुख्ने तथा एसिडिटी जस्ता समस्या देखिन सक्छन् ।
सामान्य पानी किन राम्रो मानिन्छ ?
कोठाको तापक्रममा रहेको सामान्य पानी शरीरका लागि सहज र सुरक्षित मानिन्छ । यसको तापक्रम शरीरको प्राकृतिक तापक्रमसँग नजिक हुने भएकाले शरीरले सजिलै अवशोषण गर्न सक्छ । साथै यसले पाचन प्रणालीमा अतिरिक्त दबाब पनि सिर्जना गर्दैन । विशेषगरी खाना खाँदा वा खाना खाइसकेपछि सामान्य पानी पिउनु उत्तम मानिन्छ । धेरै चिसो पानीले पाचन प्रक्रियालाई ढिलो बनाउन सक्छ भने सामान्य पानीले पाचनलाई सन्तुलित राख्न मद्दत गर्छ ।
अत्यधिक गर्मी वा धेरै पसिना बगेको अवस्थामा हल्का चिसो पानीले राहत दिन सक्छ । तर दैनिक रूपमा शरीरलाई स्वस्थ राख्न सामान्य पानी बढी उपयुक्त मानिन्छ । धेरै चिसो पानीको अत्यधिक सेवन गर्नु भने स्वास्थ्यका लागि हानिकारक हुन सक्छ ।
