धनुषाको छिरेश्वरनाथ नगरपालिकाले ज्येष्ठ नागरिकलाई घरघरमै पुगेर सम्मान गर्ने अभियान सञ्चालन गरेको छ ।
नगर प्रमुख सुखदेव यादवले ज्येष्ठ नागरिकको स्वास्थ्य र सहजतालाई ध्यानमा राख्दै उनीहरूको घरमै पुगेर सम्मान गरिएको जानकारी दिनुभयो ।नगर प्रमुख यादवका अनुसार नगर क्षेत्रमा तीन हजार पाँच सयभन्दा बढी ज्येष्ठ नागरिक रहेका छन्, जसमध्ये हालसम्म एक हजार पाँच सयभन्दा बढीलाई सम्मान गरिसकिएको छ । बाँकी ज्येष्ठ नागरिकलाई पनि क्रमशः घरदैलोमै पुगेर सम्मान गरिने उहाँले बताउनुभयो ।सम्मानस्वरूप महिलालाई साडी र पुरुषलाई धोती प्रदान गरिएको नगरपालिकाले जनाएको छ । नगरका १० वटा वडामध्ये हालसम्म वडा नम्बर १ देखि ५ सम्मका ज्येष्ठ नागरिकलाई घरमै पुगेर सम्मान गरिएको छ ।
नगर प्रमुख यादवले कार्यालयमा कार्यक्रम गरेर सम्मान गर्दा धेरै ज्येष्ठ नागरिकलाई आवतजावतमा कठिनाइ हुने भएकाले घरदैलोमै पुग्ने व्यवस्था गरिएको स्पष्ट पार्नुभयो ।उहाँका अनुसार घरघरमै पुगेर सम्मान गर्दा ज्येष्ठ नागरिकको स्वास्थ्य अवस्था र जीवनशैलीबारे प्रत्यक्ष जानकारी लिन पनि सहज भएको छ । उहाँले भन्नुभयो, “ज्येष्ठ नागरिक समाजका मार्गदर्शक हुन्, उहाँहरूलाई सम्मानपूर्वक सेवा दिनु स्थानीय सरकारको दायित्व हो ।”
नगरपालिकाले अशक्त तथा हिँडडुल गर्न नसक्ने नागरिकलाई लक्षित गर्दै सामाजिक सुरक्षा भत्ता पनि घरमै पुर्याउने व्यवस्था मिलाउने तयारी गरिरहेको जनाएको छ ।
