महोत्तरीको औरही नगरपालिका–१ निवासी ४० वर्षीय जोगेन्द्र मण्डलले गम्भीर रोगको उपचारका लागि आर्थिक सहयोगको अपिल गर्नुभएको छ ।
वैदेशिक रोजगारीका क्रममा पक्षघात (प्यारालाइसिस) भएपछि स्वदेश फर्किएका मण्डल हाल किड्नी, पेनक्रियाज तथा पेटसम्बन्धी जटिल समस्याबाट पीडित हुनुहुन्छ । परिवारका अनुसार उहाँको एउटा किड्नी पूर्ण रूपमा खराब भइसकेको छ । पछिल्लो छ महिनादेखि लगातार पेट दुख्ने, बान्ता हुने तथा शरीर अत्यधिक कमजोर हुँदै जाने समस्या देखिएको छ । आर्थिक अभावका कारण समयमै उपचार गराउन नसक्दा स्वास्थ्य अवस्था थप जटिल बन्दै गएको पीडित मण्डलले बताउनुभयो ।
“विदेशमा रहँदा पक्षघात भयो, त्यहीँ उपचार गराएर नेपाल फर्किएँ । नेपाल आएको केही महिनापछि फेरि पेटमा असह्य पीडा सुरु भयो । अहिले सामान्य हिँडडुल गर्न सक्छु तर उपचार गर्ने पैसा छैन,” मण्डलले भन्नुभयो । उहाँले वैदेशिक रोजगारीबाट कमाएको सम्पूर्ण रकम उपचारमै खर्च भएको र थोरै जग्गासमेत बैंकमा धितो राख्नुपरेको बताउनुभयो । घरको एक मात्र कमाउने व्यक्ति बिरामी परेपछि परिवार गम्भीर आर्थिक संकटमा परेको छ । मण्डलका चार साना छोराछोरी छन्, जसमध्ये एक छोरा र एक छोरी शारीरिक रूपमा अशक्त रहेको परिवारले जनाएको छ । श्रीमती प्रमिला देवीका अनुसार उपचार खर्च धान्न नसक्ने अवस्था भएकाले परिवार थप समस्यामा परेको छ ।
“घरमा कमाउने मान्छे नै बिरामी भएपछि बालबच्चाको पालनपोषण गर्नसमेत गाह्रो भएको छ । हालसम्म उपचारमा धेरै रकम खर्च भइसकेको छ, अब थप उपचार गराउन सक्ने अवस्था छैन,” प्रमिला देवीले भन्नुभयो । यता औरही नगरपालिका–१ निवासी तथा राष्ट्रिय स्वतन्त्र पार्टी (रास्वपा) का नगर उपसभापति मनोजकुमार चौधरी ले मण्डलको उपचारका लागि आर्थिक सहयोग जुटाउने पहल सुरु गर्नुभएको छ । उहाँले उपचार अभावमा एउटा परिवार ठूलो संकटमा परेको भन्दै सहयोग गर्न सबैसँग आग्रह गर्नुभएको छ ।
परिवारका अनुसार हालसम्म उपचारमा करिब १५ लाख रुपैयाँ खर्च भइसकेको छ भने थप १० लाख रुपैयाँ आवश्यक पर्ने बताइएको छ ।
