वीरगञ्ज महानगरपालिकाका मेयर राजेशमान सिंहका स्वकीय सचिव सत्यराज घिमिरेलाई प्रहरीले पर्सा जिल्ला अदालत परिसरबाट सोधपुछका लागी प्रहरीले जिल्ला प्रहरी कार्यालय पर्सामा ल्याएको छ ।
वडा प्रहरी कार्यालय श्रीपुरबाट प्रहरी निरीक्षक नवीन थापा मगरको नेतृत्वमा खटिएको प्रहरी टोलीले सोमबार अदालत परिसरबाटै घिमिरेलाई जिल्ला प्रहरी कार्यालय लगेको हो । मेयर सिंहविरुद्ध नागरिकता लिखतसम्बन्धी कसुरमा अनुसन्धानका लागि पर्सा जिल्ला अदालतले गत जेठ ८ गते पक्राउ पुर्जी जारी गरेर १२ गते मात्रै प्रहरी कार्यालयमा पुगेको थियो । सोही विषयमा कानुनी प्रक्रिया बुझ्नका लागि घिमिरे बिहान करिब १० बजे अदालत पुगेका बेला प्रहरीले उनलाई सोधपुछका लागि नियन्त्रणमा लिएको मेयर सिंहका प्रेस सल्लाहकार नवराज फुयाँलले जानकारी दिएका छन् ।
फुयाँलका अनुसार मेयर सिंह सोमबार अदालतमा उपस्थित हुने तयारीमा रहेका थिए । सोही सन्दर्भमा आवश्यक कानुनी प्रक्रिया बुझ्न घिमिरे अदालत पुगेका थिए । “आज मेयर साब अदालतमा हाजिर हुने कुरा थियो । त्यही विषयमा कानुनी प्रक्रिया बुझ्नका लागि घिमिरे अदालत जानुभएको थियो । त्यही बेला प्रहरीले सोधपुछ गर्नुपर्छ भन्दै जिल्ला प्रहरी कार्यालय लगेको हो,” फुयाँलले भने ।
यता जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक हरिबहादुर बस्नेतले भने घिमिरेलाई पक्राउ नगरी सोधपुछका लागि मात्रै ल्याइएको बताएका छन् । “मेयरका विषयमा केही बुझ्नका लागि घिमिरेलाई ल्याइएको हो । नियन्त्रण वा पक्राउ गरिएको होइन,” बस्नेतले भने । मेयर सिंहविरुद्ध पक्राउ पुर्जी जारी भएपछि उनी गत बुधबार पर्सा जिल्ला अदालतमा उपस्थित भएका थिए । अदालत प्रशासन कक्षमा पुगेका सिंह अदालतमा सुनुवाइ नभएपछी स्वत थुनामा जानुपर्नेमा नाटकिय रूपमा फरार भएका थिए ।
सरकारी वकिलकाे कार्यालयले जिल्ला अदालतमा दायर गरेकाे नागरिकता लिखतसम्बन्धी मुद्दामा मेयर राजेशमान सिंह, उनकी कान्छी भनिएकी श्रीमती सिन्धुपाल्चोकको इन्द्रावती नगरपालिका निवासी रिता भट्टराई तथा वीरगञ्ज महानगरपालिका वडा नम्बर–३ का तत्कालीन स्थानीय पञ्जिकाधिकारी भिखारी रायविरुद्ध पक्राउ पुर्जी जारी गरेको थियो ।
मेयर सिंहले रिता भट्टराईकी छोरी रुविना श्रेष्ठलाई आफ्नी छोरीका रूपमा देखाएर फर्जी जन्मदर्ताका आधारमा नागरिकता बनाएको समाचार सिधाकुरामा आएपछि उजुरी परेको थियाे । सोही प्रकरणमा लिखतसम्बन्धी कसुरको मुद्दा दायर भएको हो । यद्यपि, मेयर सिंहले रिता भट्टराई आफ्नो दोस्रो श्रीमती भएको दाबी गर्न कहिले छाेडपत्र त कहिले विभिन्न कानुनी छिद्र प्रयाेग गरी जाेगिन खाेज्दै आएका छन् ।
सरकारी वकिल कार्यालयका अनुसार वीरगञ्ज–३ निवासी लियाकत अलीले २०८० माघमा जिल्ला प्रहरी कार्यालय पर्सामा मेयर सिंहविरुद्ध सरकारी कागजात तथा नागरिकता किर्तेसम्बन्धी उजुरी दिएका थिए ।
सम्बन्धित समाचार
