मुलुकबाट बाहिरिने विदेशी मुद्राको तुलनामा भित्रिने रकम बढी हुँदा नेपालको शोधनान्तर बचत गत आर्थिक वर्षको तुलनामा दोब्बर भएको छ ।
नेपाल राष्ट्र बैंकले सार्वजनिक गरेको चालु आर्थिक वर्षको १० महिनाको तथ्यांकअनुसार (वैशाख मसान्तसम्म) शोधनान्तर स्थिति ८ खर्ब ६३ अर्ब ५६ करोड रुपैयाँ बचतमा रहेको छ । गत आर्थिक वर्षको सोही अवधिमा यो ४ खर्ब ३८ अर्ब ५२ करोड रुपैयाँ बचतमा थियो ।
अमेरिकी डलरमा पनि शोधनान्तर बचत वृद्धि भएको छ । गत वर्ष ३ अर्ब २३ करोड डलर रहेको शोधनान्तर स्थिति चालु वर्षको १० महिनामा ५ अर्ब ९८ करोड डलर पुगेको राष्ट्र बैंकले जनाएको छ । शोधनान्तर स्थिति भनेको निश्चित समयावधिभित्र आवासीय र गैरआवासीय व्यक्ति तथा संस्थाबीच भएका सम्पूर्ण आर्थिक तथा वित्तीय कारोबारको सारांश हो । शोधनान्तर बचत हुँदा विदेशी मुद्रा आप्रवाह बढ्छ भने घाटा हुँदा बाह्य मुद्रा बाहिरिने प्रवृत्ति बढी हुन्छ ।
यसमा चालु खाता र पूँजी तथा वित्तीय खातामा भएका सबै प्रकारका अन्तर्राष्ट्रिय कारोबार समेटिन्छन् । नेपालको हकमा रेमिट्यान्स आप्रवाह उच्च रहँदा शोधनान्तर स्थितिमा सकारात्मक प्रभाव परेको छ । समीक्षा अवधिमा चालु खाता ७ खर्ब २९ अर्ब २८ करोड रुपैयाँ बचतमा रहेको छ, जुन अघिल्लो वर्षको सोही अवधिमा २ खर्ब ७२ अर्ब ५३ करोड रुपैयाँ थियो । अमेरिकी डलरमा चालु खाता बचत पनि २ अर्ब १ करोडबाट बढेर ५ अर्ब ५ करोड पुगेको छ ।
यस अवधिमा खुद पुँजीगत ट्रान्सफर १४ अर्ब ६५ करोड रुपैयाँ र प्रत्यक्ष वैदेशिक लगानी १६ अर्ब ९६ करोड रुपैयाँ भित्रिएको राष्ट्र बैंकले जनाएको छ ।
