नवगठित विज्ञान, प्रविधि तथा नवप्रवर्तन मन्त्रालयले नेतृत्व पाएसँगै संस्थागत तथा नीतिगत काम औपचारिक रूपमा सुरु गरेको छ ।
नेपाल सरकारको पछिल्लो कार्यविभाजनअनुसार साविकको शिक्षा, विज्ञान तथा प्रविधि मन्त्रालयबाट विज्ञान तथा प्रविधि क्षेत्र अलग गरी नवप्रवर्तन थपेर विज्ञान, प्रविधि तथा नवप्रवर्तन मन्त्रालय गठन गरिएको हो। सो मन्त्रालयको जिम्मेवारी स्वतन्त्र सांसद महावीर पुनले मंगलबारदेखि मन्त्रीका रूपमा सम्हाल्नुभएको छ ।
मन्त्रालयकी सचिव इन्जिनियरिङ सेवाकी प्रमिला बज्राचार्यले केही दिनअघि नै जिम्मेवारी सम्हाल्नुभएको हो । उहाँका अनुसार मन्त्रालयले सिंहदरबारस्थित साविक युवा तथा खेलकुद मन्त्रालयको कार्यालयबाट औपचारिक रूपमा काम सुरु गरेको छ ।
मन्त्री पुनले मन्त्रालय नयाँ भएकाले शून्यबाट काम सुरु गर्नुपर्ने अवस्था रहेको उल्लेख गर्दै पदबहालीपछि मन्त्रालयको संगठन तथा व्यवस्थापन सर्वेक्षण (ओएनएम) गर्ने निर्णय गर्नुभएको छ ।
सचिव बज्राचार्यले मन्त्रालयले प्रारम्भिक चरणका कामहरू तीव्र रूपमा अघि बढाइरहेको जानकारी दिँदै मन्त्रालयको वेबसाइटको नमुना तयार पारेर सूचना प्रविधि विभागलाई पठाइसकिएको बताउनुभयो । उहाँका अनुसार प्राविधिक प्रक्रियाका कारण वेबसाइट ७२ घण्टापछि अपलोड हुने जानकारी प्राप्त भएको छ ।
हाल मन्त्रालयमा २४ जना कर्मचारी कार्यरत रहेका छन्। नयाँ संगठन संरचना तयार भएपछि कर्मचारी संख्या बढ्ने जनाइएको छ ।
यसैबीच, मन्त्री पुन मन्त्रालयमै सरकारी निवास कायम गर्ने गरी सिंहदरबारमा बसाइँ सर्नुभएको छ ।
