प्रधानमन्त्री बालेन्द्र शाहले सरकारी सम्पत्ति तथा सार्वजनिक रकमको दोहन भएका घटनामा सरकार दृढतापूर्वक अघि बढ्ने र दोषीमाथि कारबाही प्रक्रिया अगाडि बढाइने बताएका छन् ।
राष्ट्रिय स्वतन्त्र पार्टी (रास्वपा) को प्रथम महाधिवेशनलाई आइतबार सम्बोधन गर्दै प्रधानमन्त्री शाहले पछिल्लो समय अख्तियार दुरुपयोग अनुसन्धान आयोगका पदाधिकारीहरूसँग भएको सोधपुछका विषयमा भइरहेको चर्चाप्रति प्रतिक्रिया दिएका हुन् ।
उनले आवश्यक परे अख्तियारसँग पाँच घण्टा मात्र नभई पाँच वर्षसम्म पनि सरसल्लाह र परामर्श गर्न सरकार तयार रहेको बताए। यस विषयमा अनावश्यक चिन्ता नगर्न आग्रह गर्दै उनले सरकार सुशासन र जवाफदेहिताप्रति प्रतिबद्ध रहेको उल्लेख गरे ।
प्रधानमन्त्री शाहले भने, “सरकारी सम्पत्ति र सरकारी रकम दोहन भएका घटनामा हामी निहुँ खोज्छौं । त्यस क्रममा अख्तियारसँग पाँच घण्टा सोधपुछ गर्नुपरे वा सरसल्लाह लिनुपरे पाँच घण्टा मात्र होइन, पाँच वर्षसम्म पनि परामर्श गर्न तयार छौं। त्यसमा कसैले चिन्ता लिनुपर्दैन ।”
उनले विगतमा भएका नीतिगत त्रुटि र भ्रष्टाचारविरुद्ध सरकार कठोर बन्ने संकेत गर्दै सामाजिक सञ्जालमा सरकार कहिलेकाहीँ अनियन्त्रित देखिए पनि कुनै पनि अवस्थामा नियम र कानुन नमिचिने स्पष्ट पारे ।
