हुलाकी राजमार्गअन्तर्गत मोरङको कटहरी खण्डमा एकै स्थानमा तीनवटा मालबाहक ट्रक फसेपछि सवारी आवागमन प्रभावित भएको छ । हाटखोला–कटहरी सडकखण्डमा सोमबार तीनवटा लोडेड ट्रक खाल्डोमा फसेका हुन् ।
वर्षाका कारण कच्ची सडक हिलाम्मे बनेपछि ट्रकहरू फसेका हुन् । ट्रक फसेसँगै उक्त क्षेत्रमा सवारी आवागमनमा समस्या उत्पन्न भएको छ भने ट्राफिक प्रहरीले मालबाहक सवारीसाधनको आवागमन अस्थायी रूपमा रोकेको छ ।
हुलाकी राजमार्ग निर्देशनालय योजना कार्यालय, इटहरीका प्रमुख युवराज पोखरेलका अनुसार फसेका सवारीसाधन निकाल्न मेसिन परिचालन गर्ने तयारी गरिएको छ । बर्खायाम र कच्ची सडकका कारण बढी भार बोकेका ट्रकहरू पटक–पटक फस्ने समस्या रहेको उनले बताए ।
ठेक्का सम्झौता तोडिएपछि अलपत्र परेको यो सडकखण्डमा बर्खा लागेपछि दैनिकजसो मालबाहक सवारी फस्ने गरेका छन् । राष्ट्रिय गौरवको आयोजना हुलाकी राजमार्गअन्तर्गत मोरङ खण्डमा ४४ किलोमिटर सडक पर्ने भए पनि विराटनगरको हाटखोलादेखि कटहरीको रामचोकसम्मको करिब ६ किलोमिटर सडक सबैभन्दा समस्याग्रस्त बनेको छ ।
२०७६ सालमा श्रेष्ठ कन्ट्रक्सन कम्पनी प्रालिले निर्माणको ठेक्का लिएको उक्त सडक समयमै सम्पन्न गर्न नसकेपछि ठेक्का सम्झौता रद्द गरिएको थियो । त्यसयता सडक निर्माण कार्य अलपत्र अवस्थामा रहेको छ ।
योजना कार्यालयका प्रमुख पोखरेलले कटहरी खण्डको निर्माणका लागि नयाँ ठेक्का आह्वान गर्ने तयारी अन्तिम चरणमा पुगेको जानकारी दिए । उनका अनुसार भौतिक पूर्वाधार तथा यातायात मन्त्रालयबाट आवश्यक सहमति प्राप्त भइसकेको छ र लागत अनुमान स्वीकृत भएपछि एक साताभित्र नयाँ ठेक्काको सूचना प्रकाशित गरिनेछ ।
यसअघि ठेक्का रद्द गर्ने निर्णयविरुद्ध ठेकेदार कम्पनीले सर्वोच्च अदालतमा दायर गरेको मुद्दा खारेज भइसकेकाले अब नयाँ ठेक्का प्रक्रियामा कुनै कानुनी अवरोध नरहेको उनले बताए । सरकारले पूर्व–पश्चिम हुलाकी राजमार्ग निर्माणका लागि २९ अर्ब रुपैयाँ बजेट विनियोजन गरेको छ ।
