रौतहट । जिल्लामा बढ्दो ‘टिपर आतंक’, सडकको दुर्दशा तथा लगातार भइरहेका सवारी दुर्घटनाको विरोधमा स्थानीय बासिन्दा आन्दोलित भएका छन् । क्रसर उद्योगसँग सम्बन्धित टिपरहरूको लापरबाहीका कारण अनाहकमा ज्यान गुमाउनुपरेको भन्दै स्थानीयले चक्काजाम गर्दै सडक अवरुद्ध गरेका हुन् ।
गढीमाई र गरुडा नगरपालिकाको बेवास्ताका कारण गरुडा–समनपुर सडकखण्डअन्तर्गत चाँदी पुल नजिक सोमबार बिहानदेखि स्थानीयले सडक अवरुद्ध गर्दै चक्काजाम सुरु गरेका छन् ।
बिहान ६ बजेदेखि सुरु भएको चक्काजामका कारण दर्जनौँ सवारी साधन बाटोमै रोकिएका छन् भने यात्रुहरू गन्तव्यतर्फ जान नसकेका छन् । स्थानीयका अनुसार क्रसर उद्योगका टिपरहरूले क्षमताभन्दा बढी भार बोकेर नदीजन्य पदार्थ ढुवानी गर्दा सडक जीर्ण बनेको र दुर्घटनाको जोखिम बढेको छ ।
आन्दोलनकारीहरूले क्रसर उद्योगसँग सम्बन्धित टिपरहरूको लापरबाहीका कारण पटक–पटक दुर्घटना भइरहेको र स्थानीय तह मौन बसेको आरोप लगाएका छन् । स्थानीय जोगेन्द्र सहनीका अनुसार पालिकाको बेवास्ताका कारण आन्दोलनमा उत्रिन बाध्य भएको हो ।
त्यसैगरी मलाही गाउँका सहनीले टिपर सञ्चालक र क्रसर व्यवसायीको लापरबाहीले सडक सञ्जाल ध्वस्त बन्दै गएको र स्थानीय जनजीवन प्रभावित भएकाले आन्दोलन गर्न बाध्य भएको बताए ।
हालै भएका दुई छुट्टाछुट्टै दुर्घटनाले स्थानीय आक्रोश थप बढाएको छ । गत जेठ २७ गते टिपरको ठक्करबाट मलाही निवासी ३५ वर्षीय प्रमोद सहनीको मृत्यु भएको थियो भने असार २ गते कटहरिया निवासी शेख सोयलको पनि ज्यान गएको थियो ।
