चितवन । कृषि, वन तथा पर्यावरण मन्त्री गीता चौधरीले चितवन राष्ट्रिय निकुञ्ज र आसपासका क्षेत्रमा मानव–वन्यजन्तु द्वन्द्व व्यवस्थापनका विषयमा सरोकारवालासँग छलफल गरेकी छन् ।
रास्वपा महाधिवेशनसँगै चितवन पुगेकी मन्त्री चौधरीले भ्रमणका क्रममा जैविक विविधता संरक्षण, समस्याग्रस्त वन्यजन्तुको व्यवस्थापन, वैज्ञानिक अनुसन्धान तथा मानव–वन्यजन्तु द्वन्द्व न्यूनीकरणका उपायहरूबारे विस्तृत जानकारी लिएकी हुन् ।
भ्रमणका क्रममा उनले वन्यजन्तु र मानवबीच सहअस्तित्व कायम गर्न सरकारले आवश्यक सबै कदम दृढताका साथ अघि बढाउने प्रतिबद्धता व्यक्त गरिन् ।
मन्त्री चौधरीले चितवनको देवनगरमा प्रस्तावित ‘टाइगर सेन्चुरी’ निर्माण स्थलको स्थलगत अवलोकनसमेत गरेकी छन् । सरकारले देवनगर क्षेत्रमा टाइगर सेन्चुरी निर्माण गर्ने योजना अघि सारेको छ ।
देशभर हाल करिब एक दर्जनभन्दा बढी समस्याग्रस्त बाघहरू इन्क्लोजरमा राखिएको छ । तिनको व्यवस्थापन खर्चिलो बन्दै गएको पृष्ठभूमिमा सरकारले देवनगरमा करिब ५० हेक्टर क्षेत्रफलमा टाइगर सेन्चुरी निर्माण गर्ने तयारी गरेको हो ।
मन्त्री चौधरीले टाइगर सेन्चुरी निर्माण भएपछि समस्याग्रस्त तथा घाइते बाघहरूले प्राकृतिक वातावरण प्राप्त गर्ने मात्र नभई पर्या–पर्यटन प्रवर्द्धनमा समेत महत्वपूर्ण योगदान पुग्ने विश्वास व्यक्त गरिन् ।
उनले उक्त परियोजनासम्बन्धी आवश्यक योजनाबारे निकुञ्ज प्रशासनसँग पनि छलफल गरेकी छन् ।
