नेपाल आयल निगमको कोशी प्रादेशिक कार्यालय विराटनगरका लागि इन्धन ढुवानी गर्दै आएको एक पेट्रोल ट्याङ्कर पार्किङस्थलबाट हराएपछि सुनसरीमा बेवारिसे अवस्थामा फेला परेको छ । घटनामा ट्याङ्करबाट ९७३ लिटर पेट्रोल चोरी भएको पुष्टि भएको छ ।
इण्डियन आयल कर्पोरेसनको सिलिगुढी डिपोबाट २० हजार लिटर पेट्रोल लोड गरी असार ७ गते विराटनगरको कञ्चनबारीस्थित पार्किङमा राखिएको को १ ख ६१९० नम्बरको ट्याङ्कर असार ८ गते बिहान रहस्यमय रूपमा गायब भएको थियो । नविन ढुवानी सेवा प्रालिको स्वामित्वमा रहेको उक्त ट्याङ्कर हराएको जानकारी ढुवानीकर्ताले नेपाल आयल निगमलाई लिखित रूपमा गराएका थिए ।
ट्याङ्कर हराएको जानकारी प्राप्त हुनासाथ निगमले जिल्ला प्रहरी कार्यालय मोरङलाई खबर गरेको थियो । त्यसपछि प्रहरीले घटनाबारे अनुसन्धान अघि बढाउँदै सीसीटीभी फुटेजको अध्ययन गरेको थियो । फुटेजमा ट्याङ्कर असार ८ गते बिहान ३ बजेर ३ मिनेटमा पार्किङस्थलबाट बाहिरिएको र नोबेल शिक्षण अस्पतालतर्फ मोडिएको देखिएको थियो ।
त्यसपछि निगमका कर्मचारी, प्रहरी र ढुवानीकर्ताको टोलीले संयुक्त रूपमा खोजी अभियान तीव्र पारेको थियो । खोजीका क्रममा विराटनगर डिपोबाट करिब १७ किलोमिटर टाढा सुनसरीको भोक्राहा नरसिंह गाउँपालिका–८ स्थित हुलाकी राजमार्गमा ट्याङ्कर बेवारिसे अवस्थामा फेला परेको थियो । ट्याङ्करको ताला काटिएको अवस्थामा भेटिएपछि इन्धन चोरी भएको आशंका गरिएको थियो ।
जिल्ला प्रहरी कार्यालय सुनसरी, निगमका कर्मचारी तथा ढुवानी कम्पनीका प्रतिनिधिको रोहबरमा घटनास्थलको मुचुल्का तयार गरी ट्याङ्कर नियन्त्रणमा लिइएको थियो । त्यसपछि थप अनुसन्धानका लागि आवश्यक कागजात सुनसरी प्रहरीले मोरङ प्रहरीलाई बुझाएको थियो। ट्याङ्करलाई निगमको पार्किङमा ल्याई सिलबन्दी गरेर राखिएको थियो ।
बुधबार जिल्ला प्रशासन कार्यालय मोरङ, जिल्ला प्रहरी कार्यालय मोरङ, पत्रकार तथा अन्य सरोकारवाला निकायका प्रतिनिधिको उपस्थितिमा ट्याङ्करको सिल खोलेर इन्धनको गुणस्तर तथा परिमाण परीक्षण गरिएको थियो । परीक्षणका क्रममा पेट्रोलको गुणस्तर सामान्य अवस्थामा रहेको पाइए पनि २० हजार लिटरमध्ये ९७३ लिटर पेट्रोल चोरी भएको पुष्टि भएको छ ।
ट्याङ्करमा बाँकी रहेको १९ हजार २७ लिटर पेट्रोल निगमको भण्डारण केन्द्रमा सुरक्षित रूपमा खाली गरिएको नेपाल आयल निगमले जनाएको छ ।
नेपाल आयल निगमको पेट्रोलियम पदार्थ ढुवानी विनियमावली, २०७३ अनुसार चोरी भएको ९७३ लिटर पेट्रोलको दोब्बर बराबरको रकम ढुवानीकर्ताबाट असुल गरिएको कोशी प्रादेशिक कार्यालयका प्रमुख पुस्कर कार्कीले जानकारी दिए ।
यस घटनासँग सम्बन्धित विषयमा केही सञ्चारमाध्यम तथा सामाजिक सञ्जालमा भ्रामक र तथ्यहीन सामग्री प्रकाशित भएको भन्दै निगमले गम्भीर ध्यानाकर्षण भएको जनाएको छ । निगमले यथार्थ विवरण नबुझी प्रसारित गरिएका समाचारमा सत्यता नरहेको स्पष्ट पार्दै सरकारी निकायबाट घटनाको विस्तृत अनुसन्धान भइरहेको र आधिकारिक तथ्यका आधारमा मात्रै सूचना लिन सबैलाई आग्रह गरेको छ ।
घटनाको वास्तविक कारण, संलग्न व्यक्ति तथा चोरीमा प्रयोग भएको तरिकाबारे प्रहरीको अनुसन्धान जारी रहेको जनाइएको छ ।
