सप्तरीको तिलाठी कोइलाडी गाउँपालिका अन्तर्गत बेल्ही भन्सारलाई भारतको कुनौली बजारसँग जोड्ने पुल वर्षौंदेखि निर्माण हुन नसक्दा नेपाल–भारत आवतजावत गर्ने सर्वसाधारणले सास्ती भोग्नुपरेको छ ।
स्थानीयका अनुसार विगतमा बाँसको अस्थायी पुलमार्फत आवतजावत हुँदै आएको थियो । तर, करिब एक दशकअघि आएको बाढीले उक्त पुल बगाएपछि हालसम्म नयाँ पुल निर्माण हुन सकेको छैन । जसका कारण बर्खायाममा हिलो र पानी तथा गर्मीयाममा धुलोको सामना गर्दै जोखिमपूर्ण यात्रा गर्नुपर्ने बाध्यता रहेको विष्णुपुर गाउँपालिकाका रामप्रसाद सदाले बताए ।
उनका अनुसार कुनौली बजार सप्तरीवासीका लागि किनमेलको प्रमुख गन्तव्य हो । त्यहाँ दैनिक उपभोग्य सामग्री राजविराज बजारभन्दा सस्तो मूल्यमा पाइने भएकाले विशेषगरी विपन्न तथा निम्न आय भएका नागरिक किनमेलका लागि नियमित रूपमा भारत जाने गरेका छन् ।
रामप्रसाद सदाका अनुसार यस नाकाबाट दैनिक करिब ४० हजारदेखि ६० हजारसम्म मानिसको आवतजावत हुने गरे पनि पुल निर्माणका लागि सम्बन्धित निकायले आवश्यक चासो नदिँदा स्थानीयले वर्षौंदेखि सास्ती भोग्नुपरेको छ ।
राजविराज–७ की रेखा चौधरीका अनुसार अहिले विवाहलगायत शुभकार्यको मौसम भएकाले अन्य समयभन्दा बढी नागरिक भारतको कुनौली बजार आउजाउ गरिरहेका छन् । पुलको अभावका कारण जोखिमपूर्ण बाटो प्रयोग गर्नुपर्ने अवस्था रहेको उनले बताइन् ।
उनले नेपाल–भारतबीच रहेको रोटी–बेटीको सम्बन्धका कारण विवाह, व्रतबन्ध, उपचार तथा किनमेलका लागि दुवैतर्फका नागरिक यही नाका प्रयोग गर्ने गरेको उल्लेख गर्दै सुरक्षित आवतजावतका लागि पुल निर्माणलाई तत्काल प्राथमिकता दिन सम्बन्धित निकायसँग आग्रह गरिन् ।
