आकर्षक तलबसहित वैदेशिक रोजगारीमा विभिन्न देश पठाइदिने प्रलोभन देखाएर लाखौँ रुपैयाँ ठगी गरेको आरोपमा प्रहरीले चार जनालाई पक्राउ गरेको छ ।
काठमाडौं उपत्यका अपराध अनुसन्धान कार्यालय टेकुको प्रहरी टोलीले फरक–फरक स्थान र समयमा उनीहरूलाई पक्राउ गरेको हो । पक्राउ पर्नेमा नवलपरासी पश्चिम सुस्ता गाउँपालिका–१ घर भई हाल काठमाडौंको बुढानिलकण्ठ बस्ने २३ वर्षीय सन्देश चौधरी, नवलपरासी पश्चिम देवचुली–५ का ५३ वर्षीय भगवत प्रसाद थारू, चितवन भरतपुर–४ घर भई हाल ललितपुर बस्ने ४० वर्षीया सरस्वती बारघरे तथा काठमाडौं–२९ बस्ने ३७ वर्षीय विकास दाहाल रहेका छन् ।
प्रहरीका अनुसार सन्देश चौधरीले मकाउ पठाइदिने भन्दै एक पीडितबाट ५ लाख रुपैयाँ, भगवत प्रसाद थारूले पोल्याण्ड पठाइदिने भन्दै २३ लाख रुपैयाँ, सरस्वती बारघरेले क्यानडा पठाइदिने भन्दै १६ लाख रुपैयाँ र विकास दाहालले क्यानडा पठाइदिने प्रलोभनमा ३ लाख ९२ हजार रुपैयाँ ठगी गरेका थिए ।
ठगीपछि सम्पर्कविहीन बनेको भन्दै पीडितहरूले दिएको उजुरीका आधारमा प्रहरीले अनुसन्धान अघि बढाएको थियो। सोही क्रममा सन्देश र भगवतलाई बुधबार काठमाडौंका विभिन्न स्थानबाट तथा सरस्वती र विकासलाई बिहीबार क्रमशः ललितपुर र काठमाडौंबाट पक्राउ गरिएको प्रहरीले जनाएको छ ।
पक्राउ परेका चारै जनालाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जानकारी दिएको छ ।
