जनकपुरधाम। मधेस प्रदेश जनस्वास्थ्य प्रयोगशालाले पूर्ण क्षमतामा सेवा सञ्चालन गरेपछि स्थानीय नागरिकले निजी प्रयोगशालाको तुलनामा निकै न्यून शुल्कमा स्वास्थ्य परीक्षण सेवा पाउन थालेका छन् ।
बोलपत्र प्रक्रियामार्फत आवश्यक औषधि तथा केमिकल खरिद भएपछि केही महिनायता प्रयोगशालाले पुनः पूर्ण क्षमतामा स्वास्थ्य परीक्षण सेवा सञ्चालन गरेको हो । हाल प्रयोगशालाबाट निजी क्षेत्रका प्रयोगशालाभन्दा कम शुल्कमा दैनिक ५ सयभन्दा बढी सेवाग्राहीले स्वास्थ्य परीक्षण गराइरहेका छन् । मधेस प्रदेश जनस्वास्थ्य प्रयोगशालाका निमित्त निर्देशक डा. नागेन्द्र यादवका अनुसार प्रयोगशालाबाट हाल २५६ प्रकारका स्वास्थ्य परीक्षण सेवा उपलब्ध छन् ।
२०७८ साल कात्तिक १५ गते स्थापना भएको उक्त प्रयोगशालाले मधेस प्रदेशका आठवटै जिल्लाका १३६ स्थानीय तहमा जनस्वास्थ्य प्रयोगशालामार्फत स्वास्थ्य परीक्षण सेवा प्रदान गर्दै आएको उहाँले जानकारी दिनुभयो । निर्देशक डा. यादवका अनुसार आर्थिक वर्ष २०८२/८३ मा मात्रै जनकपुरधामस्थित मुख्य प्रयोगशाला तथा स्थानीय तहमा सञ्चालित जनस्वास्थ्य प्रयोगशालामार्फत ८ लाख ५५ हजार ५८२ जनाको स्वास्थ्य परीक्षण गरिएको छ ।
त्यसमध्ये जनकपुरधामस्थित प्रयोगशालाबाट २ लाख ३ हजार ५८७ तथा स्थानीय तहमा सञ्चालित जनस्वास्थ्य प्रयोगशालाबाट ६ लाख ५१ हजार ९९५ जनाको स्वास्थ्य परीक्षण गरिएको छ । स्वास्थ्य परीक्षण सेवामार्फत प्रयोगशालाले आर्थिक वर्ष २०८२/८३ मा ४ करोड ७६ लाख ५२ हजार ८७ रुपैयाँ राजस्व संकलन गरेको छ । यसमध्ये जनकपुरधामस्थित प्रयोगशालाबाट २ करोड ७५ लाख ५२ हजार ५२२ रुपैयाँ तथा स्थानीय तहमा सञ्चालित प्रयोगशालाबाट २ करोड ९९ हजार ५६५ रुपैयाँ राजस्व संकलन भएको निर्देशक डा. यादवले जानकारी दिनुभयो ।
प्रयोगशालाले ज्येष्ठ नागरिक तथा दीर्घरोगीलाई स्वास्थ्य परीक्षण शुल्कमा ९० प्रतिशत र अपाङ्गता भएका व्यक्तिलाई ५० प्रतिशत छुट प्रदान गर्दै आएको जनाएको छ ।
यसैबीच, प्रयोगशालाले सञ्चालनमा ल्याएको ‘इन्टिग्रेटेड’ सेवा प्रणालीमार्फत सेवाग्राहीले एउटै स्थानबाट विभिन्न प्रकारका स्वास्थ्य परीक्षण गराउन सक्ने सुविधा पाएका छन् । नेपालका अधिकांश सरकारी स्वास्थ्य संस्थामा बिरामीले विभिन्न शाखा धाउनुपर्ने अवस्था रहेको सन्दर्भमा यो व्यवस्था सेवामैत्री सुधारको उदाहरण बनेको भन्दै स्थानीयवासीले सकारात्मक प्रतिक्रिया दिएका छन् ।
