साउन महिनाको पहिलो सोमबारका अवसरमा पर्साको पेटर्वा सुगौली गाउँपालिकास्थित प्रसिद्ध धार्मिक तीर्थस्थल भाथा धाम (बाबा दुधेश्वरनाथ महादेव) मा दर्शन तथा जल अर्पण गर्ने श्रद्धालुको बिहानैदेखि ठूलो घुइँचो लागेको छ ।
भाथा धामका शम्भु महतो थारुका अनुसार आज बिहानैदेखि नेपालका विभिन्न जिल्ला तथा भारतको बिहारलगायत सीमावर्ती क्षेत्रबाट आएका भक्तजनको उल्लेखनीय उपस्थिती रहेको छ । श्रद्धालुहरूले ‘बोलबम’ को जयघोष गर्दै सोता नदीमा स्नान गरी गङ्गाजल लिएर पहाडमाथि अवस्थित बाबा दुधेश्वरनाथ महादेव मन्दिरमा जल अर्पण गरिरहेका छन् ।
धार्मिक मान्यताअनुसार साउन महिनाभरि भगवान् शिवलाई जल चढाई पूजा–आराधना गर्दा मनोकामना पूरा हुने विश्वास रहँदै आएको छ । यही आस्थाका कारण प्रत्येक वर्ष साउन महिनाभरि हजारौँ श्रद्धालु भाथा धाम पुग्ने गरेका छन् ।
मन्दिर व्यवस्थापन समितिका अनुसार साउनभरि भाथा धाममा धार्मिक मेला सञ्चालन हुनेछ । यस तीर्थस्थलमा विशेषगरी साउन महिना तथा वैशाख महिनाको त्रयोदशी (तेरस) का अवसरमा नेपाल र भारतबाट लाखौँ श्रद्धालु दर्शनका लागि आउने परम्परा रहेको छ ।
मन्दिर परिसरसँगै बग्ने सोता नदी, हरियालीले ढाकिएका पहाड तथा मनमोहक प्राकृतिक सौन्दर्यले भाथा धामको धार्मिक तथा पर्यटकीय आकर्षणलाई थप बढाएको छ । साउनको पहिलो सोमबार भक्तजनहरू उत्साह र भक्तिभावका साथ जल अर्पण गर्दै भगवान् शिवको आराधनामा सहभागी भइरहेका छन् ।
