‘भिन्न परिवेश, साझा आकाङ्क्षा’ भन्ने मूल नाराका साथ आज, अगस्ट १२ मा नेपालभर विभिन्न कार्यक्रम आयोजना गरी अन्तर्राष्ट्रिय युवा दिवस मनाइँदैछ ।
युवा सहभागिता वृद्धि, युवामैत्री शासन, रोजगारी तथा उद्यमशीलता प्रवर्द्धन गर्ने उद्देश्यले सन् २००० देखि अन्तर्राष्ट्रिय युवा दिवस मनाउन थालिएको हो। यस अवसरमा काठमाडौंमा विभिन्न कार्यक्रम आयोजना गरिएका छन् । कमलादीस्थित नेपाल प्रज्ञा–प्रतिष्ठानमा विशेष समारोह आयोजना गरिएको छ भने सूचना प्रविधि तथा स्टार्टअप प्रदर्शनीसमेत सञ्चालन गरिँदैछ । त्यस्तै, भृकुटीमण्डपदेखि कमलादीसम्म युवा जागरण दौड आयोजना गरिएको छ ।
दिवसका अवसरमा नेपालमा युवा रोजगारी तथा उद्यमशीलतासम्बन्धी उच्चस्तरीय प्यानल छलफलसमेत आयोजना गरिँदैछ। कार्यक्रममा उत्कृष्ट छ वटा स्टार्टअप तथा सातै प्रदेशबाट छनोट भएका उत्कृष्ट युवा उद्यमीलाई राष्ट्रिय पुरस्कारबाट सम्मान गरिने कार्यक्रम रहेको छ । राष्ट्रिय जनगणना २०७८ अनुसार नेपालमा १६ देखि ४० वर्ष उमेर समूहका युवाको जनसङ्ख्या कुल जनसङ्ख्याको ४२.५६ प्रतिशत, अर्थात् एक करोड २४ लाखभन्दा बढी रहेको छ। देशको कुल जनसङ्ख्यामा ठूलो हिस्सा ओगट्ने युवाको योगदान, क्षमता र विविधताबीचको एकतालाई उजागर गर्न अन्तर्राष्ट्रिय युवा दिवसले महत्वपूर्ण भूमिका खेल्दै आएको छ।
युवा जनशक्तिलाई नीति निर्माणमा अर्थपूर्ण सहभागिता गराउने, रोजगारीका अवसर विस्तार गर्ने, उद्यमशीलता प्रवर्द्धन गर्ने तथा युवामैत्री शासन व्यवस्था निर्माण गर्ने विषयलाई दिवसका अवसरमा प्राथमिकताका साथ उठाइँदैछ ।
देशको आर्थिक, सामाजिक तथा राजनीतिक रूपान्तरणमा युवाको महत्वपूर्ण भूमिका रहने भएकाले उनीहरूको क्षमता विकास, अवसरमा पहुँच र नेतृत्वदायी सहभागिता सुनिश्चित गर्नुपर्नेमा सरोकारवालाहरूले जोड दिँदै आएका छन् ।
