सर्पदंशको उपचारमा प्रयोग हुने ८ हजार २ सय भायल एन्टिस्नेक भेनम (ASVS) टेकुस्थित केन्द्रीय भ्याक्सिन स्टोरमा आइपुगेको छ ।
स्वास्थ्य सेवा विभागको नियमित खरिद प्रक्रियाअन्तर्गत बिहीबार साँझ ५ बजे ८ हजार २ सय भायल ASVS केन्द्रीय भ्याक्सिन स्टोरमा प्राप्त भएको हो । त्यस्तै, रेबिजविरुद्ध प्रयोग हुने १७ हजार ६ सय भायल रेबिज इम्युनोग्लोबुलिन (eRIG) पनि केन्द्रीय स्टोरमा आइपुगेको छ ।
स्वास्थ्य सेवा विभागका निमित्त महानिर्देशक डा. अनुज भट्टचनका अनुसार आवश्यक प्रक्रिया पूरा गरी प्राप्त भ्याक्सिन तथा औषधि सातवटै प्रदेशका स्वास्थ्य आपूर्ति केन्द्रमार्फत सम्बन्धित स्वास्थ्य संस्थामा वितरण गरिनेछ ।
सर्पदंश र रेबिजको जोखिममा रहेका बिरामीको उपचारका लागि आवश्यक सामग्री प्राप्त भएपछि देशभरका स्वास्थ्य संस्थामा उपचार सेवा थप सहज हुने अपेक्षा गरिएको छ ।
