सशस्त्र प्रहरी बल नेपालले पर्सामा भारतबाट अवैध रूपमा नेपाल भित्र्याइँदै गरेको ठूलो परिमाणको कुखुराका चल्ला बरामद गरी नष्ट गरेको छ ।
सशस्त्र प्रहरी बल नेपाल बिओपी अमरपट्टीको टोलीले शनिबार बिहान पर्साको बिन्दवासिनी गाउँपालिका–३, झौवागुठी क्षेत्रबाट भारतबाट अवैध रूपमा ल्याइँदै गरेका ४ हजार ५ सय वटा भारतीय कुखुराका चल्ला बरामद गरेको हो। बरामद चल्लाको अनुमानित मूल्य ३ लाख ३७ हजार ५ सय रुपैयाँ रहेको सशस्त्र प्रहरीले जनाएको छ ।
सशस्त्र प्रहरी पर्साका प्रमुख एसपी मोहनबहादुर क्षेत्रीले अवैध पशुपन्छी ओसारपसार तथा तस्करी नियन्त्रण अभियानलाई तीव्रता दिएसँगै सीमावर्ती क्षेत्रमा निगरानी, गस्ती र चेकजाँच बढाइएको बताएका छन् ।
प्रहरीका अनुसार शनिबार बिहान करिब ३ बजे भारतबाट नेपालतर्फ अवैध रूपमा कुखुराका चल्ला ल्याइँदै गरेको सूचना प्राप्त भएपछि बिओपी अमरपट्टीबाट टोली परिचालन गरिएको थियो । बिओपी अमरपट्टीका प्रमुख सशस्त्र प्रहरी निरीक्षक उपेन्द्र साहको नेतृत्वमा खटिएको टोलीले झौवागुठी क्षेत्रमा निगरानी तथा चेकजाँच गर्ने क्रममा भारततर्फबाट नेपाल ल्याइँदै गरेका चल्ला फेला पारेको हो ।
सशस्त्र प्रहरीको टोलीलाई देखेपछि चल्ला ल्याउँदै गरेका तस्करहरूले चल्ला घटनास्थलमै छाडेर अँध्यारोको फाइदा उठाउँदै फरार भएको प्रहरीले जनाएको छ। त्यसपछि प्रहरीले सबै चल्ला नियन्त्रणमा लिएर आवश्यक कानुनी प्रक्रिया पूरा गरेको थियो ।
भारतबाट अवैध रूपमा पशुपन्छी तथा कुखुराका चल्ला भित्र्याउँदा स्थानीय व्यवसायमा असर पर्नुका साथै पशुपन्छीजन्य रोगको जोखिमसमेत बढ्न सक्ने भएकाले सीमावर्ती क्षेत्रमा निगरानी बढाइएको सशस्त्र प्रहरीले जनाएको छ ।
पछिल्लो समय पर्साको भारतसँग जोडिएको सीमावर्ती क्षेत्रमा तस्करी नियन्त्रणका लागि सशस्त्र प्रहरीले गस्ती, निगरानी तथा चेकजाँचलाई थप प्रभावकारी बनाउँदै आएको छ । विशेषगरी अवैध रूपमा भारतबाट नेपाल भित्र्याइने कुखुराका चल्ला, पशुपन्छी, खाद्यान्न, लत्ताकपडा तथा अन्य राजस्व छलीका सामान नियन्त्रणमा लिन नियमित रूपमा टोली परिचालन हुँदै आएको प्रहरीले जनाएको छ ।
एसपी मोहनबहादुर क्षेत्रीको नेतृत्वमा अवैध पशुपन्छी ओसारपसार तथा सीमावर्ती तस्करी नियन्त्रणलाई प्राथमिकतामा राखेर मातहतका युनिटलाई सक्रिय रूपमा परिचालन गरिएको सशस्त्र प्रहरीले जनाएको छ। सोही अभियानअन्तर्गत बिओपी अमरपट्टीको टोलीले पछिल्लो कारबाहीमा ४ हजार ५ सय भारतीय कुखुराका चल्ला बरामद गरेको हो ।
बरामद गरिएका चल्ला सम्बन्धित निकायसँगको समन्वयमा नष्ट गरिएको प्रहरीले जनाएको छ । घटनामा संलग्न तस्करहरू भने चल्ला छाडेर फरार भएकाले उनीहरूको पहिचान तथा खोजीका लागि थप अनुसन्धान भइरहेको सशस्त्र प्रहरीले जनाएको छ ।
सीमावर्ती क्षेत्रमा हुने अवैध पशुपन्छी ओसारपसार तथा अन्य तस्करी नियन्त्रणका लागि आगामी दिनमा समेत निगरानी र कारबाहीलाई निरन्तरता दिने सशस्त्र प्रहरीले जनाएको छ ।
