सर्लाही | राष्ट्रिय गौरवको आयोजनाअन्तर्गत विस्तार भइरहेको पूर्वपश्चिम महेन्द्र राजमार्गमा निर्माणका लागि आवश्यक माटोको चरम अभाव भएपछि सडक विस्तारको काम प्रभावित भएको छ ।
सडकको बेस तयार गर्न आवश्यक माटो नपाउँदा निर्माण कार्य अघि बढाउन समस्या भएको कमला–ढल्केबर–पथलैया सडक आयोजना (पूर्वी खण्ड) ले जनाएको छ । व्यक्तिगत जग्गाबाट माटो खरिद गरेर ल्याउन खोज्दा पनि स्थानीय तह, स्थानीयवासी, प्रहरी प्रशासन तथा डिभिजन वन कार्यालयबाट पटकपटक रोकावट हुने गरेको आयोजना प्रमुख एवं सिनियर डिभिजन इन्जिनियर राजेशकुमार दासले बताउनुभयो ।
उहाँका अनुसार सडक विस्तारको मुख्य काम अझै बाँकी रहेकाले माटोको समस्या तत्काल समाधान नभए ठेक्का अवधिको दुई वर्ष नै माटो अभावका कारण खेर जाने अवस्था देखिएको छ । सर्लाही, महोत्तरी र धनुषामा पर्ने ७४.७५ किलोमिटर सडक विस्तारका लागि ठेक्का लागेको डेढ वर्ष बितिसकेको छ। अब ठेक्का अवधिमा करिब डेढ वर्ष मात्र बाँकी रहँदा आयोजनाको काम अपेक्षाकृत रूपमा अघि बढ्न सकेको छैन ।
आयोजना प्रमुख दासका अनुसार सडक विस्तारको समग्र प्रगति २६ प्रतिशतभन्दा बढी हुन सकेको छैन । माटोको अभावका कारण सडकतर्फको काम रोकिँदा निर्माण व्यवसायीले उपलब्ध मजदुरलाई पुल तथा कलभर्ट निर्माणमा परिचालन गरिरहेका छन् ।
पछिल्ला केही दिनमा पुल तथा कलभर्ट निर्माणका लागि खटिएका मजदुरको सङ्ख्या केही बढेको देखिए पनि आयोजनाको लक्ष्यअनुसार काम अघि बढाउन कम्तीमा आठ–नौ सय मजदुर आवश्यक पर्ने दासले बताउनुभयो । तर विभिन्न निर्माणस्थलमा १०–२० जना मजदुर मात्र परिचालन भएको देखिने गरेको उहाँको भनाइ छ ।
चाडपर्व नजिकिँदै गएकाले निर्माण व्यवसायीले भुक्तानीका लागि मजदुरको सङ्ख्या केही बढाएको हुन सक्ने उहाँले बताउनुभयो । सडक निर्माणका लागि आवश्यक माटो उपलब्ध हुन नसक्दा सडकको काम अघि बढाउन नसकिएको र उपलब्ध मजदुरलाई अन्य संरचना निर्माणमा लगाइएको आयोजनाले जनाएको छ ।
माटोको समस्या समाधानका लागि स्थानीय प्रशासन तथा डिभिजन वन कार्यालयसँग निरन्तर समन्वय भइरहेको आयोजना प्रमुख दासले बताउनुभयो । आइतबार महोत्तरीका प्रमुख जिल्ला अधिकारी, सुरक्षा निकायका प्रमुख तथा अन्य सरोकारवालासँग माटो व्यवस्थापनका विषयमा छलफल गरिएको थियो । अब सर्लाही र धनुषाका सरोकारवालासँग पनि छलफल गरी समस्या समाधानका लागि पहल गरिने आयोजनाले जनाएको छ ।
विश्व बैंकको ऋण सहयोगमा विस्तार भइरहेको महेन्द्र राजमार्गलाई बस्ती तथा बजार क्षेत्रमा छ लेन र अन्य क्षेत्रमा चार लेनको बनाउने योजना रहेको छ ।
